वेस्ट इन्डिजका तीन जना क्रिकेटरले कोरोना भाइरसको डरका कारण इंग्ल्यान्ड भ्रमण नगर्ने भएका छन्।
आगामी महिना हुने तीन वटा टेस्ट सिरिजका लागि ब्याट्सम्यान शिमरन हेटम्येर, ड्यारेन ब्राभो र अलराउन्डर किमो पाउलले इंग्ल्यान्ड भ्रमण नगर्ने भएका हुन्।
वेस्ट इन्डिजको २५ जनाको टिममा उनीहरूको नाम समावेश छैन।
क्रिकेट वेस्ट इन्डिजले इंग्ल्यान्ड भ्रमणका लागि यहि साता खेलाडीहरूको कोरोना भाइरसको परीक्षण गर्दैछ। परीक्षणपछि खेलाडीहरु जुन ८ मा इंल्यान्ड प्रस्थान गर्नेछन्।
वेस्ट इन्डिजले १४ सदस्यीय टिम र ११ जना वैकल्पिक खेलाडीलाई भ्रमण टिममा राखेको छ।
पहिलो टेस्ट ८-१२ जुलाईमा हुनेछ। यस्तै दोस्रो टेस्ट १६-२० जुलाई र तेस्रो टेस्ट २४-२८ जुलाईमा हुनेछ।
तीन वटै खेल खाली रंगशालामा हुनेछ भने सबै खेलाडी भेन्यू नजिकैको होटलमा बस्नेछन्।
वेस्ट इन्डिज टिम इंग्ल्यान्ड पुगेपछि क्वारेन्टिनमा बस्नेछ। त्यसपछि मात्र वेस्ट इन्डिजले अभ्यास थाल्नेछ।
