क्रिकेट अस्ट्रेलियाका इर्ल इडिङ्ग्सले यो वर्ष अस्ट्रेलियामा हुने तय भएको टी-२० विश्वकप आयोजना गर्नु अव्यवाहारिक हुने बताएका छन्। उनले कोरोना भाइरस कारण आगामी अक्टोबर १८ देखि नोभेम्बर १५ सम्म हुने तय भएको विश्वकप आयोजना गर्नु अव्याहारिक भएको बताएका हुन्।
यसअघि अन्तर्राष्ट्रिय क्रिकेट काउन्सिल (आइसिसी) ले क्रिकेट विश्वकप स्थगित गर्ने विषय हल्ला मात्र भएको बताउँदै एक महिनापछि परिस्थिति हेरेर निर्णय गर्ने बताएको थियो।
धेरै देशका बोर्डर बन्द भएको र हिडडुल गर्नका लागि लगाइएको प्रतिबन्धका कारण विश्वकप आयोजना सम्भव नहुने आयोजक देशका क्रिकेट संघका अध्यक्ष इडिङ्ग्सले बताएका हुन्।
'अहिलेसम्म औपचारिक रुपमा स्थगित गरिएको छैन। तर १६ देशका खेलाडीलाई अहिलेको अवस्थामा अस्ट्रेलिया ल्याउने कुरा अव्यवहारिक जस्तो लाग्छ। यो निकै कठिन कार्य पनि हो। किनकी अहिले पनि कोभिड-१९ फैलिरहेको छ,' उनले भनेका छन्।
उनले आइसिसीसँग धेरै विकल्पमा कुरा भइरहेको पनि बताए।
विश्वकप नभएको अवस्था भारतका लागि भने सुखद समाचार हुन सक्छ। किनकी भारतले त्यहि समयमा आइपिएल क्रिकेट गर्न चाहेको छ।