सिजनको क्यारेबियन प्रिमियर लिग (सिपिएल) का लागि नेपालका लेग स्पिनर सन्दीप लामिछानेले पनि आफ्नो नाम दर्ता गराएका थिए।
सन्दीपले ड्राफ्टका लागि ९० हजार अमेरिकी डलर (१ करोड ७ लाख रुपैयाँ बढी) मूल्य राखेका थिए। सो ड्राफ्ट गत असार १० गते गरिएको थियो।
तर ड्राफ्टबाट को-को खेलाडी छनोट भए अहिलेसम्म सार्वजनिक गरिएको छैन। ड्राफ्ट सार्वजनिक नगर्दा सन्दीपले यो सिजनको सिपिएल कुन टिमबाट खेल्छन् अहिलेसम्म टुंगो लागेको छैन।
सन्दीपका सहयोगी रमन सिवाकोटीका अनुसार सन्दीपले सिजनको सिपिएल खेल्ने सम्भावना अधिक भएको दाबी गर्दै औपचारिक जानकारी आउन बाँकी रहेको बताए।
उनका अनुसार सन्दीपलाई भित्र्याउन तीन टिमले इच्छा देखाएका थिए। सन्दीपलाई भित्र्याउन सेन्ट किट्स एन्ड नेभिस प्याट्रिओट्स, बार्बाडोस र जमैकाले इच्छा देखाएका थिए।
'सन्दीपलाई भित्र्याउन तीन वटा टिमले इच्छा देखाएका थिए। त्यसैले उनी ड्राफ्टमा पिक नहुने सम्भावना देख्दिन,' सिवाकोटीले सेतोपाटीसँग भने।
ड्राफ्टका लागि २३ देशका ५३७ खेलाडीले नाम दर्ता गराएकोमा सन्दीप चौथो महँगो मूल्य राख्ने खेलाडी मध्येमा थिए।
कोरोना भाइरसका कारण यसपटकको लिग एक देशमा मात्र हुने तय छ। लिग आगामी अगस्ट १८ देखि सेप्टेम्बर १० सम्म ट्रिनिडाड एन्ड टोबागोमा गर्ने आयोजकले निर्णय गरेको थियो। तर ट्रिनिडाडको सरकारले प्रतियोगिताका लागि अनुमति दिन बाँकी नै छ।
प्रतियोगिताको अनुमति प्राप्त भइनसकेको अवस्थामा ड्राफ्टबाट छनोट भएका खेलाडीको नाम सार्वजनिक नगरिएको हुन सक्ने सिवाकोटीले बताए।
'लिगको मिति तय भए पनि सरकारको अनुमति अहिलेसम्म प्राप्त भएको छैन। त्यसैले ड्राफ्टबाट छनोट भएका खेलाडीको नाम अहिलेसम्म सार्वजनिक नगरिएको हुनसक्छ,' उनले भने।
यसअघि सन्दीपले सिपिएलका दुई संस्करण खेलिसकेका छन्। २०१८ को सिजन सेन्ट किट्सबाट खेलेका सन्दीपले गत सिजन बार्बाडोसबाट खेलेका थिए।
