आइपिएल क्रिकेटअन्तर्गत रोयल च्यालेन्जर्स बेंग्लोर र मुम्बई इन्डियन्सबीचको खेलमा स्कोर बराबरी भएको छ।
सोमबार राति पहिले ब्याटिङ गरेको बेंग्लोरले ३ विकेटको क्षतिमा २०१ रनको विशाल योगफल तयार गर्यो। जवाफी ब्याटिङ गरेको मुम्बईले पनि २० ओभरमा ५ विकेटको क्षतिमा २०१ रन नै जोडेपछि स्कोर बराबरी भएको थियो।
त्यसपछि भएको सुपर ओभरमा बेंग्लोरले मुम्बईलाई पराजित गर्यो। जारी आइपिएलमा सुपर ओभरमा पुगेको यो दोस्रो खेल हो।
यसअघि दिल्ली क्यापिटल्स र किंग्स-११ पञ्जावबीचको खेलमा पनि स्कोर बराबरी हुँदा सुपर ओभरमा दिल्ली विजयी भएको थियो।
बेंग्लोरले दिएको २०२ रनको लक्ष्य पछ्याएर ब्याटिङ गरेको मुम्बईका लागि अन्तिम ओभरमा जितका लागि १९ रनको आवश्यकता परेको थियो। जसमा बेंग्लोरका इसुरु उडानाले बलिङ गरेका थिए। ब्याटिङ गरिरहेका मुम्बईका इशान किसानले तेस्रो बलमा छक्का प्रहार गरेका थिए।
अन्तिम ३ बलमा ११ रन चाहिएको अवस्थामा चौथो बलमा इशानले अर्को छक्का प्रहार गरे। पाँचौ बलमा उनी ९९ रनमा आउट भएका थिए। यसर्थ अन्तिम बलमा मुम्बईलाई ५ रन चाहिएको थियो भने स्कोर बराबरी गर्न चौका चाहिएको थियो। जसमा मुम्बईका केइरन पोलार्डले चौका हिर्काउँदा खेलमा स्कोर बराबरी भएको थियो। पोलार्डले २४ बलमा नटआउट ६० रन जोडे।
त्यसपछि भएको सुपर ओभरमा मुम्बईका पोलार्ड र हार्दिक पाण्ड्या ब्याटिङमा आए भने बलिङमा बेंग्लोरका नवदीप शैनी थिए। जसमा चौथो बलमा चौका प्रहार गरेका पोलार्ड पाँचौ बलमा आउट भए। मुम्बईले १ विकेटको क्षतिमा ७ रन जोड्यो।
सुपर ओभरमा ८ रन चाहिएको बेंग्लोरका लागि एबी डिभिलियर्स र कप्तान विराट कोहली ब्याटिङमा थिए भने बलिङमा मुम्बईका जसप्रित बुमराह थिए। जसमा पहिलो तीन बलमा बाउन्ड्री हुन सकेन। चौथो बलमा भिलियर्सले चौका हिर्काए। पाँचौ बलमा उनले एक रन लिँए। अन्तिम बलमा १ रन चाहिएको अवस्थामा कोहलीले चौका हिर्काउँदै आफ्नो टिमलाई जित दिलाए।
त्यसअघि पहिले ब्याटिङ गरेको बेंग्लोरले ३ विकेटको क्षतिमा २०१ रन जोड्यो। उसका लागि देवदूत पडिकलले ५४ रन र आरोन फिन्चले ५२ रन बटले। एबी डिभिलियर्सले २४ बलमा नटआउट ५५ रन जोडे।
बलिङमा मुम्बईका ट्रेन्ट बोल्टले २ विकेट लिए।
जवाफी ब्याटिङ गरेको मुम्बईले पनि २०१ रन नै जोड्ने क्रममा इशान किसानले ९९ रन जोडे। उनले ५८ बलमा २ चौका र ९ छक्का हिर्काए। पोलार्डले २४ बलमा नटआउट ६० रन जोडे। बलिङमा उडानाले २ विकेट लिए।
आइपिएलमा मंगलबार दिल्ली क्यापिटल्स र सनराइजर्स हैदरावादबीच खेल हुनेछ।