दिनेश कार्तिकले आइपिएल टिम कोलकता नाइट राइडर्सको कप्तानी छाडेका छन्।
ब्याटिङमा केन्द्रित हुनका लागि उनले कप्तान पद त्याग गरेका बताएका छन्। अब कोलकताको कप्तानी इंग्लिस ब्याट्सम्यान इयान मोर्गानले गर्नेछन्।
कोलकताले शुक्रबार डिफेन्डिङ च्याम्पियन मुम्बई इन्डियन्सविरुद्ध खेल्नुअघि कार्तिकको स्थानमा मोर्गानले कप्तानी गर्ने जानकारी दिएको हो।
जारी आइपिएलमा कोलकता अंक तालिकाको चौथो स्थानमा छ। ७ मध्ये कोलकताले ४ खेलमा जित हात पारेको छ।
सुरुवाती ७ खेलमा कार्तिकले ब्याटिङ गर्न संघर्ष गरेका थिए। उनले ७ खेलमा १०८ रनमा मात्र जोड्न सके। जसमा उनको उच्च स्कोर ५८ रह्यो।
कोलकताले कार्तिकले आफू ब्याटिङमा केन्द्रित हुनका लागि मोर्गानलाई कप्तानी दिन चाहेको उल्लेख गरेको छ।
सन् २०१८ मा कार्तिक कोलकतामा ७.४ करोड भारुमा आबद्ध भएका थिए। त्यसयता उनी कोलकताको कप्तान नियुक्त भएका थिए। सन् २०१८ मा उनको कप्तानीमा कोलकताले तेस्रो स्थानमा सिजन सकेको थियो। गत सिजन कोलकता पाँचौ भयो।
जारी सिजनमा मोर्गान कोलकताका लागि बढी रन जोड्ने खेलाडीको सूचीमा दोस्रो स्थानमा छन्। उनले १३० को स्ट्राइक रेटमा १७५ रन जोडेका छन्।
इंग्ल्यान्डको एकदिवसीय टिमका कप्तान रहेका मोर्गानले आफ्नो देशलाई सन् २०१९ को विश्वकप जिताएका थिए।
उनी इंग्ल्यान्डको टी२० टिमका पनि कप्तान रहिसकेका छन्। उनले इंग्ल्यान्डका लागि ८८ टी-२० मा कप्तानी गर्दा ४५ खेलमा हार बोहोरेका थिए भने ३९ खेलमा जित हात पारेका थिए। एक खेलको भने नतिजा आएको थिएन।
मोर्गन सन् २०२० मा ५.२५ भारुमा कोलकतामा आबद्ध भएका थिए।