नेपाली राष्ट्रिय क्रिकेट टिमका लेगस्पिनर सन्दीप लामिछानेले सिजन २०२०-२१ बिग ब्यास लिग (बिबिएल) होबर्ट हुरिकेन्सबाट खेल्न सक्ने भएका छन्।
अघिल्ला दुई सिजन मेलवर्न स्टार्सबाट खेलेका सन्दीपलाई यो सिजन हुरिकेन्सले भित्र्याउन प्रक्रिया अघि बढाइरहेको छ।
सन्दीपले यो सिजन टिम परिवर्तन गर्ने र उनी होबर्टमा आबद्ध हुन लागेको भन्दै डेली मेलले समाचार प्रकासित गरेको छ।
यसअघि सन्दीपका व्यवस्थापक रमन सिवाकोटीले यो सिजन मेलवर्नबाट खेल्ने सम्भावना नभएको बताएका थिए।
सिवाकोटीले अन्य टिमबाट खेल्नका लागि छलफल भए पनि कुन टिमबाट खेल्ने सार्वजनिक गरेका थिएनन्।
सन्दीपले अस्ट्रेलियाको टी–२० फ्रेञ्चाइज लिग बिबिएलमा आफ्नो तेस्रो सिजन होबर्टमा खेल्न प्रक्रिया अघि बढाएपछि मेलवर्नले अर्का स्पिनर भित्र्याउने भएको छ।
मेलवर्नले सन्दीपको स्थानमा अफगानिस्तानका जाहिर खानलाई भित्र्याउन लागेको हो। खानले गत सिजन ब्रिसबेन हिटबाट खेलेका थिए।
सन्दीपले पछिल्ला दुई सिजनमा मेलवर्नबाट २० खेल खेल्दा २६ विकेट लिएका थिए। उनको बिग ब्यास लिगमा उत्कृष्ट प्रदर्शन ३ विकेट लिएर ११ रन दिनु हो।
सिजनको बिग ब्यास लिग आगामी १० डिसेम्बरबाट सुरु हुँदैछ। लिग ६ फेब्रुअरीमा सकिनेछ।
सन्दीप गत साउनमा क्यारेबियन प्रिमियर लिग खेल्न ट्रिनिडाड एन्ड टोबागोमा गएका थिए। उनी त्यतैबाट असोज पहिलो साता आइपिएल २०२० का लागि युएई पुगेका थिए।
क्यारेबियन प्रिमियर लिगमा सन्दीपले जमैका तलावाजबाट समूह चरण र सेमिफाइनल गरी सबै ११ खेल खेल्दा १२ विकेट लिन सफल भएका थिए।
तर सिजनको आइपिएलमा सन्दीपलाई दिल्ली क्यापिटल्सले कुनै पनि खेलमा मौका दिएन।
मंगलबार भएको फाइनलमा दिल्लीलाई मुम्बई इन्डियन्सले पराजित गर्दै पाँचौ पटक उपाधि जितेको थियो।
आइपिएल सकिएसँगै सन्दीप बुधबार स्वदेश फर्किएका थिए।
