इटालियन सिरी ए मा अपराजित रहेको युभेन्टसले सोमबार राति किएभोमाथि ३-० को सहज जित निकालेको छ।
मैदानमा युभेन्ट्सलाई जित दिलाउन डुग्लास कोष्टा, इम्री क्यान र ड्यानिली रुगानीले समान एक एक गोल गरे ।
खेलको १३ औं मिनेटमा युभेन्टसका डग्लास कोस्टाले गोल गर्दै टिमलाई सुरूवाती अग्रता दिलाए।
पहिलो हाफको अन्तिम मिनेटमा पाउलो डिबालाको पासमा एम्रे क्यानले गोल गर्दै युभेन्टसको अग्रता दोब्बर पारे।
पहिलो हाफमा २-० ले अग्रता लिएको युभेन्ट्सले थप अग्रता बढाउन धेरै राम्रा मौका खेर फालेको थियो।
त्यसपछि खेलको ८४ औं मिनेटमा रूगानीले गोल गर्दै युभेन्ट्सको जित पक्का गरे ।
क्रिस्टियानो रोनाल्डो भने पेनाल्टीमा गोल गर्न चुकेका छन्। खेलको ५३ औ मिनेटमा पाएको पेनाल्टीमा रोनाल्डो गोल गर्न असफल भए। उनको प्रहार चिभोका किपर स्टेफानोले उत्कृष्ट बचाउ गरेका थिए।
किएभोका मातिया बानिले पेनाल्टी क्षेत्रमा ह्याण्डबल गरेपछि प्राप्त पेनाल्टीमा रोनाल्डो गोल गर्न चुकेका हुन्।
यसबाहेक खेलमा पनि उनी थुप्रै गोल गर्ने अवसरमा चुकेका थिए।
यो जितसँगै युभेन्ट्सले शीर्ष स्थानमा ९ अंकको अग्रता कायम गरेको छ। २० खेलबाट युभेन्टसले १८ जित र २ बराबरीसँगै ५६ अंक जोडेको छ।
दोस्रो स्थानमा रहेको नेपोलीले समान खेलबाट ४७ अंक जोडेको छ। पराजित चिभो ८ अंकसहित लिगको पुछारमा छ ।
