डिफेन्डिङ च्याम्पियन चिलीमाथि सानदार जित निकाल्दै पेरु कोपा अमेरिका २०१९ को फाइनलमा प्रवेश गरेको छ।
बिहीबार विहान भएको खेलमा पेरुले गत २ संस्करणको विजेता चिलीलाई ३-० गोलले पराजित गर्दै ४४ वर्षपछि फाइनलमा स्थान पक्का गरेको हो।
पेरु यसअघि सन् १९७५ को कोपा अमेरिकाको फाइनलमा पुगेको थियो। त्यतिबेला पेरुले कोलम्बियालाई हराएर उपाधि जितेको थियो।
पेरुका लागि इडिनसन फ्लोरेसले खेलको २१ मिनेटमा पहिलो गोल गरेका थिए। ३८ मिनेटमा पेरुले दोस्रो गोल गर्दै पहिलो हाफमै खेल पकडमा लिएको थियो। पेरुका लागि दोस्रो गोल योसिमार युटुनले गरेका थिए।
दोस्रो हाफमा थपिएको ६ मिनेटको इन्जुरी टाइमको पहिलो मिनेटमा पेरुले अर्को गोल गर्दै फाइनलतर्फ अघि बढेको थियो। उसका लागि पाउलो गुइरेरोले गोल गरेका थिए।
इन्जुरी टाइमको अन्तिम चिलीले पेनाल्टीको अवसर पाएपनि त्यसलाई सदुपयोग गर्न सकेन। इडुउरो भार्गाको पेनाल्टीलाई पेरुका गोलकिपरले बिफल पारेका थिए।
अब उपाधिका लागि पेरुले आयोजक ब्राजिलसँग आइतबार मध्य राति पौने २ बजे प्रतिस्पर्धा गर्नेछ। त्यसअघि शनिबार राति पौने १ बजे तेस्रो स्थानका लागि अर्जेन्टिना र चिलीबीच खेल हुनेछ।