इंग्लिस च्याम्पियन म्यानचेस्टर सिटीका खेलाडी फिफा वर्ष खेलाडीको मनोनयनको सूचीमा नपरेपछि सिटीका प्रशिक्षक पेप ग्वार्डिओलाले असन्तुष्टि व्यक्त गरेका छन्।
१० जनाको मनोनयनमा इंग्लिस प्रिमियर लिग खेल्ने टोटनह्यामका ह्यारी केन, लिभरपुलका भान डेक, साडियो मान र मोहमद सलाह पर्दा सिटीका एक जना खेलाडी पनि समावेश छैनन्।
सिटीले गत सिजन प्रिमियर लिगसहित, एफए कप र कारबाओ कप जितेको थियो।
‘सायद हामीले आगामी सिजनको वर्ष खेलाडीको मनोनयनमा पर्न ५ वटा ६ उपाधि जित्नु पर्छ,’ ग्वार्डिओलाको भनाइ छ, ‘गत सिजनमा बेर्नान्डो सिल्भा भन्दा राम्रो खेल्ने खेलाडी अरु कोहि थिएनन् जस्तो लागेको छ। उनले लिग र पोर्चुगल लागि युइएफए नेसन्स लिग जित्न सफल भएका थिए।’
ग्वार्डिओलाले च्याम्पियन्स लिग जिते मात्र अवार्ड दिइने उल्लेख गर्दै प्रतिस्पर्धालाई आधार नमानेको भन्दै असन्तुष्टि व्यक्त गरे।
सिटीले २०१८ मा कम्युनिटी शिल्ड जितेको थियो भने च्याम्पियन्स लिगको क्वार्टरफाइनलमा टोटनह्यामसँग पराजित भएको थियो।
सिटीका कुनै पनि खेलाडीले अहिलेसम्म पिएफए अवार्ड समेत जित्न सकेका छन्। यद्यपी सिटीले पछिल्लो ८ सिजनमा ४ पटक लिगको उपाधि जितिसकेको छ।
‘८ वर्षमा ४ लिगको उपाधि जित्नु राम्रो कुरा हो,’ उनी भन्छन्, ‘यो बीचमा एक जना खेलाडीले अवार्ड पाएनन्। डेभिड सिल्भा, भिसेन्ट कोम्पनी र याया टाउरेले पनि पाएनन्।’
उनले मोहमद सलाहलाई सम्मान गर्ने उल्लेख गर्दै केभिन डे ब्रुइनको योगदान बिर्सेकोमा दु:ख ब्यक्त गरे।
उनले ८ सिजनमा ४ उपाधि जितेको अवस्थामा रियल म्याड्रिड वा बार्सिलोनाका खेलाडी फिफा वर्ष खेलाडीको मनोनयनमा नपरेको सोच्न पनि नसकिने बताए।
फिफा अवार्डको विजेता आगामी २३ सेप्टेम्बरमा इटालीको मिलानमा आयोजना गरिने कार्यक्रममा घोषणा गरिनेछ।
उत्कृष्ट पुरुष खेलाडीको मनोनयन सूची
क्रिस्टियानो रोनाल्डो (पोर्चुगल) – युभेन्ट्स
फ्रेन्की डे जोङ (नेदरल्यान्ड्स) – अयाक्स/बार्सिलोना
माथिज डे लिट (नेदरल्यान्ड्स) –अयाक्स/युभेन्ट्स
इडिन हजार्ड (बेल्जियम) – चेल्सी/ रियल म्याड्रिड
ह्यारी केन (इंग्ल्यान्ड) – टोटनह्याम
साडियो माने (सेनेगल) – लिभरपुल
केलियन एमबाप्पे (फ्रान्स) – पिएसजी
लियोनल मेसी (अर्जेन्टिना) – बार्सिलोना
मोहमद सलाह (इजिप्ट) – लिभरपुल
भर्जिल भान डेक (नेदरल्यान्ड्स) - लिभरपुल