युरो २०२० छनोट प्रतियोगितामा नेदरल्यान्ड्सले उत्कृष्ट पुनरागमन गर्दै उत्तरी आयरल्यान्डलाई ३–१ ले पराजित गरेको छ। जितसँगै नेदरल्यान्ड्स समूह 'सी' को शीर्ष स्थानमा उक्लिएको छ।
नेदरल्यान्ड्सको जितमा डिपेले ८० र इन्जुरी टाइमको तेस्रो मिनेटमा गरी २ गोल गरे। यस्तै डि जोङले इन्जुरी टाइमको पहिलो मिनेटमा अर्को गोल गरेका थिए।
खेलमा अग्रता भने आयरल्यान्डले मेगानिसले ७५ मिनेटमा गरेको गोलबाट लिएको थियो।
समूहमा नेदरल्यान्ड्सको ५ खेलबाट १२ अंक भएको छ। ५ खेल नै खेलेको जर्मनी र ६ खेल खेलेको आयरल्यान्डको समान १२–१२ अंक नै छ।
यता समूह 'आइ' को खेलमा बेल्जियमले सान मारियोलाई ९–० ले पराजित गरेको छ।
बेल्जियमका लागि लुकाकुले २८ र ४१ मिनेटमा, चाड्लीले ३१ मिनेंटमा, एल्डरवारेल्डले ४३ मिनेटमा, टेल्सम्यानले पहिलो हाफको इन्जुरी मिनेटमा, बेन्केटेले ७९ मिनेटमा, भेर्चारेनल ८४ मिनेटमा र कास्टाङ्गेले ९० मिनेटमा गोल गरेका थिए।
जितसँगै बेल्जियमले समूहमा ७ खेलबाट २१ अंक जोडेको छ। दोस्रो स्थानमा रहेको रसियाको १८ अंक छ। रसियाले बिहीबार राति स्कटल्यान्डलाई ४–० गोलले हरायो।
अन्य खेलमा क्रोएसियाले हंगेरीलाई ३–०, पोल्यान्डले लाभिटालाई ३–०, साइप्रसले काजकिस्तानलाई २–१, अस्ट्रियाले इजरायललाई ३–१ र मेसेडोनियाले स्लोभेनियालाई २–१ ले पराजित गरेका छन्। बेलारुस र इस्टोनियाले गोलरहित बराबरी खेल्दा स्लोभाकिया र वेल्सले पनि १–१ बराबरी खेलेर अंक बाडेका छन्।
