न्युरोड टिम (एनआरटी) को प्रशिक्षकमा राजुकाजी शाक्य नियुक्त भएका छन्। शाक्य र एनआरटीबीच शुक्रबार औपचारिक सम्झौता भएको हो।
एनआरटीका अध्यक्ष सुन्दर नरसिंह जोशीका अनुसार राजुसँग एक वर्षको सम्झौता भएको हो।
'एक वर्षको अवधिमा हुने विभिन्न प्रतियोगिता, ए डिभिजन लिग अनि भयो भने राष्ट्रिय लिगका लागि उहाँसँग सम्झौता गरेका हौं,' जोशीले सेतोपाटीसँग भने।
राजुकाजीले गत सिजन च्यासल युथ क्लब सम्हालेका थिए।
गत संस्करणको सहिद स्मारक 'ए' डिभिजन लिगमा पुछारमा रहेको एनआरटीले आगामी मंसिर अन्त्यबाट हुने लिगमा उत्कृष्ट खेल्ने लक्ष्य लिएको छ।
'अघिल्लो वर्ष भर्खर 'बी' बाट उक्लिएका थियौं। खेलाडीको अभावले नयाँ खेलाडी भित्र्याउन पनि सकेनौं। अझ रेलिगेशनबिनाको लिग भयो,' जोशीले भने, 'यसपटक भने हामीले उत्कृष्ट खेल्ने लक्ष्य लिएका छौं।'
एनआरटीले सिजनका लागि चार जना नयाँ खेलाडी भित्र्याइसकेको छ। यु–१८ टिमका मिडफिल्डर एरिक विष्टसँगै फरवार्ड राजेश परियार टिममा भित्रिसकेका छन्। यस्तै अनुभवी खेलाडीद्वय विक्रम धिमाल र प्रकास बुढाथोकी पनि सिजनका लागि एनआरटीमा भित्रिएका छन्।
अध्यक्ष जोशीका अनुसार बलियो टिम बनाउनका लागि अन्य खेलाडीसँग सम्झौता गर्न कसरत भइरहेको छ।
