इटालियन क्लब ब्रेस्सियाका स्ट्राइकर मारियो बालोटेलीले आफूविरुद्ध जातीय नारा लगाउने फ्यानहरुलाई 'सानो दिमाग भएका मान्छेहरु' को संज्ञा दिएका छन्।
आइतबार राति हेलास भेरोनाविरुद्धको खेलमा बालोटेलीमाथि फ्यानहरुले जातीय नारा लगाउँदै जिस्काएका थिए।
प्याराफिटबाट जातीय नारा सुने पछि उनले दशर्नतिर बल फ्याँकिदिएका थिए। कर्नर नजिक बल लगिरहेका उनले एक्कासी बल हातमा उठाउँदै लात्ताले हानेर दर्शकतिर पुर्याएका थिए।
'यस्तो व्यवहारले फुटबललाई माथि पुर्याउँदैन,' इंग्लिस क्लब म्यानचेस्टर सिटी र लिभरपुलका पूर्व खेलाडी बालोटेलीले भनेका छन्,'तिमीहरु भन्दा सामाजिक र ऐतिहासिक परिस्थिति ठूलो हो। सानो दिमाग भएका मान्छेहरु।'
यता उनले भेरोनाका प्रमुखलाई पनि जवाफ फर्काएका छन्। भेरोनाका प्रमुख लुका कास्टेलिनीले 'बालोटेलीसँग इटालीको नागरिकता छ। तर उ कहिल्यै पूर्ण इटालियन बन्न सक्दैन' भनेर प्रतिक्रिया दिएका थिए।
३६ अन्तर्राष्ट्रिय खेल खेलेका बालोटेलीले इटालीलाई सन् २०१२ को युरोप कपको फाइनलमा पुर्याउन उत्कृष्ट खेलेका थिए।
उनले कास्टेलिनीलाई जवाफ दिँदै इन्स्टाग्राममा लेखेका छन्, 'मारियोले एक दिन फेरि इटालीका लागि गोल गर्नेछ। त्यो दिन तिमीलाई धेरै खुसी लाग्छ। म यसको ग्यारेन्टी लिन्छु।'
इटालीमा अफ्रिकी मूलका खेलाडीलाई लक्षित गर्दै जातीय गाली गर्ने क्रम बढिरहेको छ।