इंग्लिस प्रिमियर लिगका खेलाडी तथा स्टाफहरूको कोरोना भाइरसको पछिल्लो परीक्षणमा केही पनि संक्रमण नभएको देखिएको छ।
छैटौ राउन्डको परीक्षणमा ११ सय ९५ परीक्षण गरिएकोमा सबैको नतिजा नेगेटिभ आएको हो।
गत जुन ४ र ५ गते गरिएको परीक्षणमा खेलाडीहरू पूर्ण रुपमा सुरक्षित देखिएको हो।
यसअघि पाँचौ राउन्डको परिक्षणमा एक जनालाई कोरोनाको संक्रमण भेटिएको थियो। पहिलो देखि पाँचौ राउन्डसम्ममा १३ जनामा संक्रमण भेटिएको थियो।
प्रिमियर लिगमा अहिलेसम्म ६ हजार २ सय ७४ परीक्षण गरिएको छ।
कोरोना भाइरसका कारण गत मार्च १३ देखि स्थगित भएको लिग आगामी जुन १७ देखि सुरु हुँदैछ।
पहिलो दिनको खेलमा साविक विजेता म्यानचेस्टर सिटी र आर्सनल तथा एस्टन भिल्ला र सेफिल्डबीच खेल हुँदैछ।
लिगको शीर्ष टिम लिभरपुलले अंक तालिकामा दोस्रो स्थानको सिटीसँग २५ अंकले अग्रता लिएको अवस्था छ।