जर्मन तथा युरोपियन च्याम्पियन वायर्न म्युनिखका फरवार्ड रोबर्ट लेवान्डोस्कीले युइएफए पुरुष प्लेयर अफ दि इयर २०१९-२० को अवार्ड जितेका छन्।
३२ वर्षीय पोलिस स्ट्राइकर लेवान्डोस्कीले आफ्नै क्लबका गोलकिपर म्यानुएल नोएर र इंग्लिस क्लब म्यानचेस्टर सिटीका मिडफिल्डर केभिन डे ब्रुएनलाई पछि पारेर वर्ष खेलाडीको अवार्ड हात पारेका हुन्।
वायर्नकै हान्सी फ्लिकले प्रशिक्षकको अवार्ड हात पारेका छन्। वार्यनलाई छैटौं पटक युरोपियन च्याम्पियन बनाएका फ्लिकले अवार्ड जितेका हुन्।
वर्ष खेलाडीको अवार्ड जितेका लेवान्डोस्कीले गत सिजन सबै प्रतियोगितामा गरी ४७ खेल खेल्दा ५५ गोल गरेका थिए। लेवान्डोस्कीको उत्कृष्ट प्रदर्शनमा वायर्नले युरोपियन च्याम्पियन्स लिग, जर्मन बुन्डेस लिगा र जर्मन कपको उपाधि जितेको थियो।
उनले युरोपका अरु खेलाडी भन्दा १६ गोल बढी गरेका थिए। जसका कारण युइएफएले उनलाई वर्षको उत्कृष्ट फरवार्डको पनि अवार्ड प्रदान गर्यो।
अन्य विधाको अवार्ड पनि वायर्नका खेलाडीले वर्चश्व जमाएका छन्।
अवार्ड हात पार्नेको सूची :-
उत्कृष्ट गोलकिपर - म्यानुएल नोएर (वायर्न म्युनिख)
उत्कृष्ट डिफेन्डर : जोशुआ किम्मिच (वायर्न म्युनिख)
उत्कृष्ट मिडफिल्डर : केभिन डे ब्रुएन (म्यानचेस्टर सिटी)
उत्कृष्ट फरवार्ड : रोबर्ट लेवान्डोस्की (वायर्न म्युनिख)
उत्कृष्ट प्रशिक्षक : हान्सी फ्लिक (वायर्न म्युनिख)
वर्षको सर्वोत्कृष्ट खेलाडी : रोबर्ट लेवान्डोस्की (वायर्न म्युनिख)
