अर्जेन्टिनाका पूर्व फुटबलर डिएगो म्याराडोनाको मस्तिष्कको शल्यक्रिया गरिएको छ।
उनको शल्यक्रिया सफल भएको उनका चिकित्शकले जानकारी दिएका छन्।
रक्तअल्पता र डिहाइड्रेशन भएपछि उनलाई गत सोमबार अस्पताल भर्ना गरिएको थियो।
म्याराडोनाका व्यक्तिगत डाक्टर लेइपोल्डो लुकिका अनुसार उनको सामान्य शल्यक्रिया गरिएको हो। अहिले म्याराडोनाको स्वास्थ्य अवस्था नियन्त्रणमा रहेको उनले बताएका छन्।
अर्जेन्टाइन क्लब जिम्नासियाका प्रशिक्षक म्याराडोना गत शुक्रबार सार्वजनिक रुपमा देखिएका थिए।
उनको ६०औं जन्मदिनको अवसरमा क्लबले उनलाई सम्मान पत्र दिएको थियो। पैत्रोनातोविरुद्धको खेलअघि उक्त सम्मान दिइएको थियो।
तर खेलका लागि म्याराडोना मैदानमा बसेका थिएनन्। स्वास्थ्यमा समस्या भएपछि उनी खेलका लागि नबसेको बताइएको छ।
बेलाबेला बिरामी भइराख्ने म्याराडोना यसअघि जनावरी २०१९ मा पनि अस्पताल भर्ना भएका थिए। त्यतिबेला उनको पेटमा समस्या देखिएको थियो।
महान् फुटबलरको दर्जा पाएका म्याराडोनाको एकल प्रदर्शनमा अर्जेन्टिनाले सन् १९८६ को विश्वकप जित्न सफल भएको थियो।
उनले इटालीको सिरिया क्लब नेपोलीलाई दुई पल्ट लिग उपाधि जिताएका थिए।
उनी बार्सिलोना, सेभिया र बोका जुनियर्स क्लबबाट पनि देखा परे। उनी र ब्राजिलका विख्यात स्ट्राइकर पेलेबीच उत्कृष्टताको होड अहिले पनि जारी छ।
खेल जीवनमा म्याराडोना थुप्रै पल्ट विवादमा परेका थिए। उनलाई कोकिन प्रयोग गरेको आरोपमा १५ महिना प्रतिबन्ध लगाइएको थियो।
उनीमाथि १९९४ को विश्वकपमा शक्तिवर्धक लागु औषध प्रयोग गरेको आरोप लागेको थियो। १९८६ को विश्वकपमा इङ्ल्यान्डविरुद्ध उनले हातले गरेको गोल अहिले पनि ‘ह्याण्ड अफ गड’ को रुपमा चर्चित छ।