युरोपियन च्याम्पियन्स लिगमा स्पेनिस महारथी क्लब बार्सिलोनाले समूह चरणमा लगातार तेस्रो जित हात पारेको छ।
बार्सिलोनाले समूह 'जी' को खेलमा बुधबार राति डाइनामो किभलाई २-१ गोलले पराजित गर्यो।
बार्सिलोनाका लागि खेलको पाँचौ मिनेटमा लिओनल मेसीले पेनाल्टीबाट पहिलो गोल गरे।
६५ मिनेटमा जेरार्ड पिकेले बार्सिलोनाको अग्रता दोब्बर पारे। पिकेलाई गोल गर्न अन्सु फातीले पास उपलब्ध गराएका थिए।
किभका लागि ७५ मिनेटमा टेसगानकोभले गरेको गोल सान्त्वनामै सीमित बन्यो।
यसअघि बार्सिलोनाले समूह चरणमा हंगरियन क्लब फेरेनक्वेरोसी र इटालियन क्लब युभेन्ट्सलाई पराजित गरेको थियो।
यता बुधबार नै भएको समूह 'जी' को अर्को खेलमा युभेन्ट्सले फेरेनक्वेरोसीमाथि ४-१ गोलको जित हात पारेको छ।
युभेन्ट्सको जितमा अल्भारो मोराटाले खेलको सातौं र ६० मिनेटमा गरी दुई गोल गरे। यस्तै डिबालाले ७२ मिनेटमा गोल थपे।
८१ मिनेटमा फेरेनक्वेरोसीका डिभालीले आफ्नै पोस्टमा गोल गर्दा युभेन्ट्सको अग्रता ४-० मा पुगेको थियो।
खेलको अन्तिम मिनेटमा बोलीले फेरेनक्वेरोसीका लागि सान्त्वना गोल गरे।
समूहमा बार्सिलोना ९ अंकसहित शीर्ष स्थानमा छ। दोस्रो स्थानको युभेन्ट्सको ६ अंक छ भने किभ र फेरेनक्वेरोसी समान १-१ अंक छ।
