नेपाली राष्ट्रिय फुटबल टिमका व्यवस्थापक मधुसुदन उपाध्यायलाई कोरोना भाइरसको संक्रमण भएको छ।
अखिल नेपाल फुटबल संघ (एन्फा) का अनुसार बंगलादेशविरुद्धको अन्तर्राष्ट्रिय मैत्रीपूर्ण खेलका लागि ढाकामा रहेका उपाध्यायलाई कोरोनाको संक्रमण भएको हो।
संक्रमित उपाध्याय अहिले ढाकास्थित बंगबन्धु शिख मुजिब मेडिकल अस्पतालमा उपचार गराइरहेका छन्। उनको स्वास्थ्य अवस्था सामान्य रहेको छ।
ढाकामा रहेका उपाध्यायलाई संक्रमण भएपछि एन्फा अध्यक्ष कर्माछिरिङ शेर्पाले स्वास्थ्यलाभको कामना गरेका छन्।
यसअघि नेपाली टिमका एक खेलाडीलाई पनि कोरोना संक्रमण भएको थियो।
नेपाली टिम बंगलादेशविरुद्ध दुई अन्तर्राष्ट्रिय फुटबल खेल्न ढाका गएको हो।
गत कात्तिक २८ गते भएको पहिलो खेलमा नेपालमाथि घरेलु टिम बंगलादेशले २–० गोलले जित हात पारेको थियो।
मंसिर २ गते भएको दोस्रो खेलमा नेपाल र बंगलादेशले गोलरहित बराबरी खेलेका थिए।
