युरोपियन च्याम्पियन्स लिगमा इंग्लिस क्लब म्यानचेस्टर युनाइटेडलाई फ्रेञ्च क्लब पिएसजीले पराजित गरेको छ।
पिएसजीले म्यानचेस्टरलाई उसैको घरेलु मैदानमा ३-१ गोलले पराजित गरेको हो।
समूह 'एच' को खेलमा पिएसजीका लागि नेइमारले छैटौं मिनेटमा पहिलो गोल गरेका थिए। ३२ मिनेटमा म्यानचेस्टरका लागि रास्फोर्डले बराबरी गोल फर्काउन सफल भए।
६९ मिनेटमा पिएसजीका मार्किन्होस टिमका लागि दोस्रो गोल गर्न सफल भए। लगत्तै म्यानचेस्टरका फ्रेडले दोस्रो पहेँलो कार्ड पाउँदै मैदान छाडेका थिए।
दोस्रो हाफको इन्जुरी टाइमको पहिलो मिनेटमा नेइमारले टिमका लागि तेस्रो र व्यक्तिगत दोस्रो गोल गरेका थिए।
यो समूहको अर्को खेलमा जर्मन क्लब लाइपजिगले टर्कीस क्लब इस्तानबुललाई ४-३ गोलले पराजित गरेको छ।
समूहमा शीर्ष स्थानमा रहेको म्यानचेस्टर, दोस्रो स्थानको पिएसजी र तेस्रो स्थानको लाइपजिगको समान ९-९ अंक छ। ३ अंक जोडेको इस्तानबुल बाहिरिएको छ। अब अन्तिम खेलपछि तीन टिम मध्ये दुई टिम नकआउट चरणमा पुग्नेछन्।
यता समूह 'ई' को खेलमा इंग्लिस क्लब चेल्सीले स्पेनिस क्लब सेभियालाई ४-० गोलले पराजित गरेको छ।
चेल्सीका लागि ओलिभर जिरुडले चारै गोल गरे। उनले खेलको ४, ५४, ७४ र ८३ मिनेटमा गोल गरेका थिए।
समूहबाट दुवै टिम नकआउट चरणमा पुगिसकेका छन्।
