एथ्लेटिक बिल्बाओले आगामी महिना स्पेनिस घरेलु फुटबल प्रतियोगिता 'कोपा डेल रे'को दुई वटा फाइनल खेल्ने भएको छ।
बिहीबार राति भएको सिजन २०२०-२१ को दोस्रो सेमिफाइनलमा बिल्बाओले लेभान्तेलाई २-१ ले हराएर फाइनलमा स्थान पक्का गर्यो।
यसअघि कोरोना भाइरसले प्रभावित बनेको सिजन २०१९-२० को फाइनलमा पनि बिल्बाओले स्थान बनाएको थियो।
अब सिजन २०१९-२० को फाइनल आगामी अप्रिल ३ मा सेभियामा हुनेछ।
सो फाइनलमा बिल्बाओले रियल सोसिडाडसँग उपाधिका लागि प्रतिस्पर्धा गर्नेछ।
सिजन २०२०-२१ को फाइनल अप्रिल १७ मा सेभियामै हुनेछ।
यो सिजनको फाइनलमा बिल्बाओले बार्सिलोनासँग प्रतिस्पर्धा गर्नेछ।