अखिल नेपाल फुटबल संघ (एन्फा) ले आगामी मार्चमा तीन देश सम्मिलित अन्तर्राष्ट्रिय फुटबल प्रतियोगिता गर्ने घोषणा गरेको छ। प्रतियोगितामा नेपालसहित बंगलादेश र किर्गिस्तानले सहभागिता जनाउने एन्फाले जनाएको छ।
दशरथ रंगशालामा हुने मैत्रीपूर्ण अन्तर्राष्ट्रिय प्रतियोगितामा आगामी चैत ९ देखि १७ गतेसम्म हुनेछ।
प्रतियोगितामा नेपाल र बगंलादेशको राष्ट्रिय टोलीले प्रतिस्पर्धा गर्ने भए पनि किर्गिस्तानको २३ वर्ष मुनिको टोलीले खेल्नेछ । राउण्ड रोबिनमा हुने प्रतियोगिताको शीर्ष २ टोलीले फाइनल खेल खेल्नेछन् ।
यो प्रतियोगितालाई विश्व फुटबलको सर्वोच्च निकाय फिफाले पनि मान्यता दिएको छ ।
नेपालले खेल्ने भनिएको फिफा विश्वकप२०२२ र एएफसी एसियन कप २०२३ को छनौट खेलहरु फेरि स्थगित भएपछि एन्फाले यो प्रतियोगिता आयोजना गर्न लागेको हो।
हाल राष्ट्रिय टोलीको प्रशिक्षणमा ३१ खेलाडी रहेका छन्। यिनै खेलाडीबाट मैत्रीपूर्ण प्रतियोगिताका लागि राष्ट्रिय टोलीको निर्माण हुनेछ।
