स्पेनिस ला लिगामा एट्लेटिको म्याड्रिडले शीर्ष स्थानमा तीन अंकको अग्रता बनाउने मौका गुमाएको छ।
आइतबार राति भएको खेलमा रियल बेटिससँग १-१ गोलको बराबरीमा रोकिएसँगै एट्लेटिकोले अग्रता बढाउने अवसर गुमाएको हो।
बेटिसको मैदानमा भएको खेलमा एट्लेटिकोले पाँचौ मिनेटमा गोल गरेर अग्रता लिएको थियो। एट्लेटिकोका लागि कारास्कोले गोल गरेका थिए।
घरेलु टिम बेटिसले २० मिनेटमा बराबरी गोल फर्कायो। बेटिसका लागि टेलोले गोल गरे।
गत जनावरीको अन्त्यमा शीर्ष स्थानमा १० अंकको अग्रता लिएको एट्लेटिकोको अब उपाधि जित्ने सम्भावना कठिन हुँदै गएको छ।
उसले पछिल्ला ११ खेलमा तीन खेलमा मात्र जित हात पारेको छ।
अंक तालिकामा शीर्ष स्थानको एटलेटिकोको ३० खेलबाट ६७ अंक छ। दोस्रो स्थानको रियल म्याड्रिडको ६६ अंक छ भने बार्सिलोना ६५ अंक जोडेर तेस्रो स्थानमा छ।