बार्सिलोनाले स्पेनिस ला लिगाको शीर्ष स्थानमा उक्लने मौका गुमाएको छ।
बिहीबार राति भएको लिगको खेलमा ग्रानडासँग घरेलु मैदानमै पराजित भएपछि बार्सिलोनाले एट्लेटिको म्याड्रिड र रियल म्याड्रिडलाई पछि पार्दै शीर्ष स्थानमा उक्लने मौका गुमाएको हो।
बार्सिलोनालाई ग्रानडाले २-१ गोलले पराजित गरेको हो।
खेलमा अग्रता भने बार्सिलोनाले लिएको थियो।
बार्सिलोनाका लागि कप्तान लिओनल मेसीले २३ मिनेटमा गोल गरेका थिए। उनलाई गोल गर्न एन्टोनी ग्रिजम्यानले पास उपलब्ध गराएका थिए।
पहिलो हाफमा १-० गोलले पछि परेको ग्रानडाले दोस्रो हाफमा दुई गोल गर्यो।
उसका लागि मचिसले ६३ मिनेट र मोलिनाले ७९ मिनेटमा गोल गरे।
हारसँगै तेस्रो स्थानमा सीमित बार्सिलोनाको ३३ खेलबाट ७१ अंक छ।
दोस्रो स्थानको रियलको पनि ७१ अंक नै छ। शीर्ष स्थानको एट्लेटिकोको ७३ अंक छ।
चौथो स्थानको सेभियाले पनि शीर्ष तीन टिमलाई पछ्याइरहेको छ। उसले ७० अंक बटुलेको छ।
बार्सिलोनालाई हराएको ग्रानडा ४५ अंक जोडेर आठौं स्थानमा छ।