इंग्लिस प्रिमियर लिगमा चेल्सीले लेस्टर सिटीलाई २-१ गोलले पराजित गरेको छ।
जितसँगै शीर्ष चारमा रहेर युरोपियन च्याम्पियन्स लिगमा छनोट हुने चेल्सीको अभियान बलियो भएको छ। लेस्टर भने शीर्ष चारमा नपर्ने खतरा बढेको छ। किनभने आगामी खेलमा जित हात पारे लेस्टरलाई लिभरपुलले पछि पार्नेछ।
लेस्टरविरुद्ध जित हात पार्ने क्रममा चेल्सीका रुडिगरले ४७ मिनेट र जोर्गिन्होले ६६ मिनेटमा पेनाल्टीबाट गोल गरे।
लेस्टरका लागि केलेजी इहानाचोले ७८ मिनेटमा गरेको गोल सान्त्वनामै सीमित बन्यो।
यता सिजनको प्रिमियर लिगको उपाधि जितेको म्यानचेस्टर सिटी भने पराजित भएको छ।
सिटीलाई ब्राइटनले ३-२ गोलले पराजित गर्यो। खेलको दोस्रो मिनेटमा गुन्डोगनले गोल गर्दै सिटीलाई अग्रता दिलाए।
तर १० मिनेटमा कान्सेलो रातो कार्ड पाउँदै मैदान बाहिर निस्किदा सिटी १० खेलाडीमा सीमित बनेको थियो। उनले ब्राइटनका वेलबेकलाई फल गरेका थिए।
यद्यपी सिटी पहिलो हाफमा १-० ले अघि रह्यो।
४८ मिनेटमा फोडेनले सिटीको अग्रता दोब्बर पारे। त्यसपछि ब्राइटनले तीन गोल गर्यो। उसका लागि ट्रोसार्डले ५०, वेभस्टरले ७२ र वर्नले ७६ मिनेटमा गोल गरे।
म्यानचेस्टर युनाइटेड पनि बराबरीमा रोकिएको छ। उसलाई फुलहमले १-१ गोलको बराबरीमा रोकेको हो।
युनाइटेडका लागि काभानीले १५ मिनेटमा गोल गरेर अग्रता दिलाए। तर ७६ मिनेटमा फुलहमका ब्रायनले बराबरी गोल फर्काए।
अंक तालिकामा शीर्ष स्थानको म्यानचेस्टर सिटीको अन्तिम खेलअघि ८३ अंक छ। दोस्रो स्थानको म्यानचेस्टर युनाइटेडको ७१ अंक, तेस्रो स्थानको चेल्सीको ६७ अंक र चौथो स्थानको लेस्टरको ६६ अंक छ। दुई खेल खेल्न बाँकी पाँचौ स्थानको लिभरपुलको ६३ अंक छ।
