अखिल नेपाल फुटबल संघ (एन्फा) का उपाध्यक्ष कृष्ण थापाले दुई दिनदेखि सामाजिक सञ्जाल फेसबुकमा आफ्नो असन्तुष्टि पोखिरहेका छन्।
एन्फाको प्राविधिक समितिका संयोजक समेत रहेका थापालाई गत वैशाख २ गते अन्तिम चरणको यू-१३ खेलाडी छनोट गर्ने जिम्मेवारी दिइएको थियो।
छनोटका लागि छनोट समिति बनाइ प्रतिवेदन बुझाउन एन्फाले पत्राचार गरेको थापा स्वयम्ले फेसबुकमार्फत सार्वजनिक गरेको पत्रमा भनिएको छ।
उपाध्यक्ष थापाले सोही छनोटको विषयलाई लिएर असन्तुष्टि पोखिरहेका हुन्। उनले आफ्नो हस्ताक्षरबिना एन्फाले अन्तिम छनोट गरेको भन्दै विरोध गरिरहेका छन्।
यसअघि एन्फाले गत शुक्रबार युथ एकेडेमीका लागि ४२ खेलाडी छनोट गरेको सार्वजनिक गरेको थियो। जसमा २१ खेलाडी छात्रबृत्ति प्राप्त हुने र बाँकी खेलाडीले पैसा तिरेर एकेडेमीमा बस्न पाउने एन्फाको भनाइ थियो।
एन्फा स्रोतका अनुसार खेलाडी छनोट गर्दा उपाध्यक्ष थापालाई बराम्बार सम्पर्क गर्न खोजे पनि सम्पर्कमा नआएको भनाइ छ।
जसका कारण एन्फाले खेलाडीको भविष्यलाई मध्यनगर गर्दै छनोट प्रक्रियामा रहेका अन्य समितिसहितको सहयोगमा खेलाडी छनोट गरेको बताएको छ।
छनोट प्रक्रिया विवादमा आएपछि खेलकुद सम्बन्धी वेव पोर्टल खेलपाटीले 'भान्जा छनोटमा नपरेपछि उपाध्यक्षको रडाको' शीर्षकमा समाचार प्रकाशित गरेको थियो।
तर थापाले फेसबुमार्फत उनले आफूले भन्जाका लागि नभइ विधिको शासनका लागि आवाज उठाएको बताएका छन्।
यसविषयमा एन्फा अध्यक्ष कर्माछिरिङ शेर्पाले कान्तिपुर दैनिकसँग कुरा गर्दै थापाले विरोध गर्नुको कारण 'अर्कै' भएको बताउँदै 'पछि थाहा भइहाल्छ' भनेका थिए।
