सिरिया फिफा विश्वकप २०२२ कतार अन्तर्गत एसिया छनोटको तेस्रो चरणमा प्रवेश गरेको छ।
फिफा विश्वकप २०२२ कतार तथा एएफसी एसियन कप २०२३ चीनको संयुक्त छनोटको समूह 'ए' को खेलमा गुआमलाई ३-० ले पराजित गरेसँगै सिरिया विश्वकप छनोटको तेस्रो चरणमा पुगेको हो।
तेस्रो चरणमा पुगेसँगै सिरिया सन् २०२३ को एएफसी एसियन कपका लागि छनोट भएको छ।
समूहको अन्तिम खेलअघि सिरियाले ७ खेलबाट २१ अंक जोडेको छ। दोस्रो स्थानको चीनको ६ खेलबाट १३ अंक छ। अन्तिम २ खेलअघि चीन शीर्ष स्थान नपुग्ने पक्का भएसँगै सिरिया समूह विजेता बनेको हो।
चीनले सोमबार भएको खेलमा फिलिपिन्सलाई २-० गोलले पराजित गर्यो।
छनोटको दोस्रो चरणको समूहमा शीर्ष हुने टिम विश्वकप छनोटको तेस्रो चरणमा पुग्नका साथै एसिया कपमा सिधैं छनोट हुने प्रावधान छ।
यता जपान पनि विश्वकप छनोटको तेस्रो चरणमा पुगेको छ। जापानले 'एफ' अन्तर्गतको खेलमा सोमबार ताजकिस्तानलाई ४-१ गोलले पराजित गर्यो।
समूहको शीर्ष स्थानमा रहेको जापानले अन्तिम खेलअघि २१ अंक जोडेको छ। दोस्रो स्थानको ताजकिस्तानको १० अंक मात्र छ।