नेपाल र मरिससबीच दशरथ रंगशालामा हुने अन्तर्राष्ट्रिय मैत्रीपूर्ण खेलमा दर्शकलाई प्रवेश दिइने भएको छ।
अखिल नेपाल फुटबल संघ (एन्फा) ले आगामी शनिबार र मंगलबार हुने दुवै खेलको सम्पूर्ण तयारी पूरा भएको जनाउँदै दर्शकलाई पनि प्रवेश दिने जनाकारी दिएको हो।
एन्फाका अनुसार रंगशालामा एक तिहाई दर्शकलाई मात्र प्रवेश दिइनेछ। दशरथ रंगशालाको क्षमता १५ हजारको हाराहारीमा भएकाले ५ हजार दर्शकलाई प्रवेश दिइने भएको हो।
सरकारले दर्शकलाई प्रवेश दिनका लागि अनुमति दिएको एन्फाको भनाइ छ। तर दर्शकले स्वास्थ्य मापदण्ड भने पालना गर्नु पर्नेछ। यसअघि सरकारले रंगशालामा खेल हेर्न जाने दर्शकले खोप कार्ड देखाउनु पर्ने नियम लागू गरेको थियो।
खेलका लागि भिआइपी प्यारापिटतर्फ १ हजार रुपैयाँ र साधारण प्यारापिटतर्फ ५ सय रुपैयाँ टिकट मूल्य तोकिएको छ।
दुवै खेल दशरथ रंगशालामा अपरान्ह ४:४५ बजे सुरू हुनेछ।
नेपालसँग खेल्नका लगि मरिसको टिम हिजो सोमबार काठमाडौं आइपुगेको थियो।
साफ च्याम्पियनसीपअन्तर्गत गत अक्टोबर १६ मा भारतविरूद्ध फाइनल खेलेपछि नेपाली टिम पहिलो पटक मैदान उत्रन लागेको हो।
यस्तै सेप्टेम्बरपछि नेपाल पहिलो पटक घरेलु मैदानमा प्रतिस्पर्धा गर्दैछ।
हाल फिफा वरीयाताको १६९ औं स्थानमा रहेको नेपालका लागि मरिसस नयाँ प्रतिद्वन्द्वी हो।
फिफा वरीयताको १७२ औं स्थानमा रहेकाले मरिसस नेपालका लागि समान स्तरको प्रतिद्वन्द्वी हो। जसका कारण खेल प्रतिस्पर्धात्मक हुने विश्वास गरिएको छ।
नेपालसँग प्रतिस्पर्धा गर्न सोमबार बिहान काठमाडौं आइपुग्ने मरिससले सन् २०१९ को मार्चदेखि जित निकाल्न सकेको छैन।
२०१९ मार्च २१ मा न्यू क्यालेडोनियालाई ३-१ ले हराएयता मरिसस जितविहीन छ। त्यसयता मरिससले ९ खेल खेल्दा १ खेल बराबरी गर्नु नै उपलब्धि हो। बाँकी ८ खेलमा मरिसस पराजित भएको थियो।
तीन वर्षको अवधिमा अफ्रिका कप अप नेसन्सको छनोटअन्तर्गत जिम्बावेसँग समग्रमा ७-१ ले पराजित हुँदा मरिसस विश्वकप छनोटमा मोजाम्बिकसँग समग्रमा ३-० ले हारेको थियो।
मरिससको टिममा युरोपका क्लबबाट व्यवसायिक खेल्ने खेलाडी छन्। डिफेन्डर लिन्ड्ले रोस पोल्यान्डको शीर्ष डिभिजनको क्लब लेगिया वार्साबाट खेल्छन्।
यस्तै मिडफिल्डर एडेल लाङले स्पेनिस ला लिगा क्लब अलाभेसबाट खेल्ने गरेका छन्। मिडफिल्डर जेरेमी भिलेनिभ फ्रान्सको दोस्रो डिभिजनको क्लब लु पे र फरवार्ड ग्यारी नोइल इंग्ल्यान्डको क्षेत्रीय लिग खेल्ने क्लब लेविस एफसीमा आबद्ध छन्।
नेपालका प्रशिक्षक अब्दुल्लाह अलमुताइरीले मरिससविरूद्धको खेललाई सिक्ने अवसरको रूपमा लिएको बताएका छन्। यो खेलका लागि नयाँ खेलाडीलाई मौका दिने पनि उनको भनाइ छ।
गत सातादेखि प्रशिक्षण थालेको टिममा प्रशिक्षक अब्दुल्लाहले ३४ खेलाडीलाई बोलाएका छन्। यीमध्ये पाँच खेलाडीलाई कोभिड-१९ को संक्रमण देखिएको छ। पाँचमध्ये तीन खेलाडी नेपाली टिमका महत्वपूर्ण खेलाडी भएको बताइएको छ।
