युनियन लाइफ इन्स्योरेन्स कम्पनीको आइपिओमा अहिलेसम्मकै सबैभन्दा धेरै आवेदन परेको छ।
सिडिएस एण्ड क्लियरिङका प्रवक्ता सुरेश न्यौपानेले कम्पनीको आइपिओमा २१ लाख ५० हजार ४ सयले आवेदन दिएको जानकारी दिए। आइपिओ भर्नेको यो संख्या अहिलेसम्मकै उच्च रहेको उनले बताए। बैंक तथा वित्तीय संस्थाबाट भर्नेको संख्या थपिँदा यो अझ बढ्नेछ।
कर्मचारी र सामूहिक लगानी कोषलाई छुट्याएपछि बाँकी रहेको ५८ लाख ५ हजार कित्ता सेयर सर्वसाधारणलाई बाँडफाँड हुनेछ। तसर्थ कम्पनीको आइपिओ ५ लाख ८० हजार ५ सय जनाले मात्रै १०–१० कित्ताका दरले पाउने छन्।
भरेको साढे २१ लाख संख्यालाई हेर्दा २७ प्रतिशतले मात्रै सेयर पाउने छन्। बाँकीको हात रित्तो हुनेछ। यद्यपि केही आवेदन थपिन सक्ने छ भने केही आवेदन रद्द हुन सक्नेछ।
आजदेखि आवेदन बन्द भएको छ। नयाँ जीवन बीमा कम्पनीमध्ये यसअघि प्रभु, ज्योति र रिलायन्स लाइफले आइपिओ जारी गरिसकेका छन्। आइएमई, रिलायबल, सिटिजन, सन नेपाल, सानिमा र महालक्ष्मी लाइफ इन्स्योरेन्स कम्पनीले आइपिओ जारी गर्न बाँकी छ। यी कम्पनीहरूले पनि क्रमश आइपिओ जारी गर्नेछन्।
कस्तो छ कम्पनी?
नयाँ बानेश्वरमा प्रधान कार्यालय रहेको यो पछिबाट खुलेको जीवन बीमा कम्पनी हो। संचालनमा आइरहेको यस कम्पनीले चैत मसान्तसम्म खुद ८ करोड २५ लाख रुपैयाँ नाफा कमाएको छ। सो अवधिसम्म कम्पनीको खुद बीमा शुल्क ५ अर्ब रुपैयाँ पुगेको छ।
कम्पनीको प्रतिसेयर नेटवर्थ १४८ रुपैयाँ ४६ पैसा छ भने प्रतिसेयर आम्दानी ३३ रुपैयाँ ३३ पैसा छ। कम्पनीले सर्वसाधारणमा सेयर जारी गरेपछि भने प्रतिसेयर आम्दानी घट्नेछ। यसमा ७० प्रतिशत संस्थापक र ३० प्रतिशत सर्वसाधारणको सेयर रहनेछ।
शुलभ अग्रवाल, शेखर गोल्छा, शाहिलकुमार अग्रवाल, संदिपकुमार अग्रवाल लगायत संस्थापक छन्।
