राष्ट्र बैंकबाट घ वर्गको सम्वन्धनप्राप्त लघुवित्त संस्थाहरुले २० प्रतिशतभन्दा धेरै लाभांश दिँदा जगेडा कोषमा रकम जम्मा गर्नुपर्ने भएको छ।
वार्षिक २० प्रतिशतभन्दा बढी नगद वा बोनस वितरणको प्रस्ताव गरेमा २० प्रतिशतभन्दा माथिको प्रस्तावित लाभांशमा ५० प्रतिशतले हुने रकम साधारण जगेडा कोषमा जम्मा गर्नुपर्नेछ।
हालसम्म यो व्यवस्था थिएन। लघुवित्त संस्थाहरुले पनि गत आर्थिक वर्षको वितरणयोग्य मुनाफाबाट ३० प्रतिशतसम्म मात्रै नगद लाभांश घोषणा तथा वितरण गर्न पाउने भएका छन्। यो व्यवस्था भने गत वर्ष पनि लागू गरिएको थियो।
खुद वितरणयोग्य मुनाफा कुल चुक्ता पुँजीको ५ प्रतिशतभन्दा कम भएका इजाजतप्राप्त संस्थाले कर प्रयोजनबाहेक नगद लाभांश वितरण गर्न पाउने छैनन्।
कोभिड १९ महामारीको कारणले बैंकिङ सम्पत्तिको गुणस्तरमा परेको प्रभावलाई दृष्टिगत गरी समग्र वित्तीय स्थायित्व प्रबद्र्धन गर्न असल वर्गमा वर्गीकरण भएका कर्जाको हकमा इजाजतपत्रप्राप्त संस्थाले आ.ब. २०७७/७८ को वार्षिक वित्तीय विवरण तयार गर्दादेखि साधारण कर्जा नोक्सानी व्यवस्था १ प्रतिशतको अतिरिक्त ०.३ प्रतिशत थप गरी कुल १.३ प्रतिशत कर्जा नोक्सानी व्यवस्था कायम गर्नु पर्नेछ।