एनएमबि बैंक एसियाको उत्कृष्ट बैंक बनेको छ। बुधबार काठमाडौंमा एक कार्यक्रम आयोजना गर्दै एनएमबीले एसियाकै उत्कृष्ट बैंक बन्न सफल भएको घोषणा गरेको हो।
एनएमबीलाई लन्डनस्थित फाइनान्सियल टाइम्सले ‘बैंक अफ दी एसिया २०२१’ नामक अवार्ड दिएको हो।
एक शाखा र ३५ कर्मचारीबाट बैंकिङ सेवा सुरू गरेको एनएमबी १३ वर्षको यात्रामा चारपटक ‘बैंक अफ द इयर’ हुँदै यसपटक नेपालको पहिलो एसियाको उत्कृष्ट बैंक बन्न सफल भएको हो।
यो उपलब्धि राष्ट्र बैंक, सम्पूर्ण बैंक तथा वित्तीय संस्था र मुलुकका लागि गौरवको विषय भएको बैंकका सिइओ सुनिल केसीले बताए।
चीन, भारत, हङकङ, दक्षिण एसिया र जापान जस्ता एसियाकै कडा प्रतिस्पर्धीलाई पछि पार्दै एनएमबी एसियाकै उत्कृष्ट बैंक घोषित भएको उनले जानकारी दिए।
'एसियाका ४८ मुलुकलाई पछाडि पार्दै एनएमबी बैंक सर्वोत्कृष्ट बन्नु सबैको जित हो,' सिइओ केसीले भने, 'आफूभन्दा अघि आएका बैंकहरूभन्दा एनएमबीले दिगो विकासका लागि काम गरेको हुँदा उत्कृष्ट बन्न सफल भएको हो।'
बैंकले सुशासन र वित्तीय साक्षरतामा ध्यान दिँदै बोर्ड व्यवस्थापनप्रतिको विश्वासले यो सम्भव भएको उनी बताउँछन्।
'हामीले चमत्कार चाहेनौं, दिगो बैंकलाई मध्यनजर गर्दै काम गरिरहेका छौं,' उनले भने, 'विदेशीबाट सबभन्दा बढी पैसा ल्याउने बैंकका रूपमा एनएमबी नै रहेको छ।'
उनका अनुसार बैंकले ४५ भन्दा बढी जलविद्युतमा लगानी गरेको छ। त्यस्तै सिमेन्टमा लगानी गरी मुलुकलाई सिमेन्टमा आत्मनिर्भर बनाउन सहयोग गरेको छ। त्यस्तै, देशमा नयाँ उद्यमी जन्माउनेदेखि विदेशबाट ठूलो रकम नेपाल भित्र्याउन एनएमबी बैंकले ठूलो पहल गरेको बैंकका अध्यक्ष पवन गोल्यानले बताए।
अवार्ड घोषणा कार्यक्रममा उनले भने, ‘आजभन्दा ४ वर्षअगाडि विदेशमा भएको ‘बैंक अफ दी एसिया’ अवार्ड वितरण कार्यक्रममा सहभागी हुँदा मैले सिइओसापलाई हामीले पनि अबको ३ वर्षभित्र यही अवार्ड पाउनुपर्छ भनेको थिएँ। एक वर्ष ढिलो भइयो, तर हामी यो अवार्ड पाउन सफल भयौं। यो गौरवको विषय हो।’
सन् २००० मा स्थापित बैंक अफ दी इयर अवार्ड प्रत्येक वर्ष विभिन्न देशका उत्कृष्ट बैंकिङ सेवा दिने बैंकहरूले पाउँदै आएका छन्।
बैंकको वृद्धि र कार्य सम्पादनको शैली, बैंकका रणनीतिक पहलहरू, डिजिटल प्रविधि उपयोग गर्दै ल्याइएका नवीनतम सेवा र उत्पादनहरू, दीगो विकासका लागि गरिएका गतिविधि र प्रतिकुल परिस्थिति सामना गर्ने क्षमताजस्ता विभिन्न मापदण्डका आधारमा यो अवार्ड प्रदान गरिन्छ।
