आन्तरिक र बाह्य पर्यटकका लागि पोखरा लेकसाइड सेदीदेखि सराङकोटसम्म अन्नपूर्ण केबलकार सुरू भएको परिप्रेक्षमा सनराइज बैंकले आफ्ना ग्राहकहरूलाई विशेष छुटको व्यवस्था गरेको छ।
बैंकले आफ्ना ग्राहकहरूको सहजता तथा सुविधालाई मध्यनजर गर्दै केबलकार सुविधा प्रयोग गरे बापत छुट पाउने बारेमा सम्झौता पत्रमा हस्ताक्षर गरेको हो।
सम्झौता पश्चात बैंकका ग्राहकहरूले पोखरास्थित अन्नपूर्ण केबल कारको टिकट खरिद गर्दा सनराइज बैंकको क्रेडिट वा डेबिट कार्डको माध्यमबाट भुक्तानी गर्दा १० प्रतिशतको विशेष छुट पाउन सक्नेछन्।
बैंकले 'स्मार्ट बनौं, डिजिटल बैंकिङ गरौं' अभियान अनुरूप आफ्ना ग्राहकहरूलाई नगद कारोबारबाट डिजिटल कारोबारमा जान उत्प्रेरित गर्दै आएको छ। बैंकले ग्राहकहरूको अपेक्षा अनुरूप नबिनतम् सेवा-सुविधाहरू थप गर्दै जाने समेत जनाएको छ।
