नेप्से अन्तर्दिनको कारोबारमा करिब २२ सयको तहसम्म पुगेर फर्किएको छ। यो तह मनोवैज्ञानिक बन्न सक्ने देखिएको छ।
सेयर बजारमा धेरै संस्थाको मूल्य एक वर्ष यताकै कम भएकोले पनि क्रमशः लगानी बढ्न सक्ने देखिएको हो। अन्य परिस्थितिहरू यथावत नै रहेपनि लगानीकर्ताहरू बजार सुधारको पक्षमा एकै ठाउँमा उभ्भिन थालेको, नीति निर्माताहरूको तहमा लगानीकर्ताहरूले आफ्ना आवाजहरू मुखरित गर्न थालेकोले पनि सकारात्मक सञ्चार भएको हो। यद्यपि बजारको दिशा अझै स्पष्ट बनिसकेको छैन।
आगामी दिनमा नीति निर्माताहरूको तहबाट हुनसक्ने सानातिना सुधारले पनि बजारलाई केही सकारात्मक गति दिन सक्छ। अहिलेलाई लगानीकर्ताहरूले राम्रो प्रतिफल दिने र मूल्यमा ठूलै करेक्सन आइसकेका कम्पनीहरूमा लगानी गर्न सही हुन्छ।
साताको पहिलो दिन आज सेयर बजार १७.९५ अंकले बढेर २,२५६.५७ विन्दुमा पुगेको हो। गत साता नेप्से परिसूचक करिब १ सय १७ अंकले घटेर २ हजार २ सय ३८ बिन्दुमा आएको थियो।
आज नेप्से बढेपनि कारोबार रकम भने घटेको छ। आज जम्मा ३३ लाख ४१ हजार २१४ सेयर किनबेच हुँदा एक अर्ब ३२ करोड ६४ लाख २१ हजार रुपैयाँको कारोबार भएको छ।
आइतबार कुल २३३ धितोपत्र तथा ऋणपत्र कारोबारमा आएकामध्ये १४४ वटाको सेयर बढेको छ भने ७१ वटाको घटेको छ। कारोबारमा आएका १३ उपसमूहहरूमध्ये माइक्रोफाइनान्स र बैंकिङ बाहेक सबैको सकारात्मक देखिएको छ। आज सबैभन्दा धेरै फाइनान्सको ३.३५ प्रतिशत, विकाश बैंकको २.८४ प्रतिशत र हाइड्रोपावरको २.७१ प्रतिशतले बढेको हो।
जाल्पा सामुदायिक लघुवित्त वित्तीय संस्थाको आज पनि सकारात्मक सर्किट ब्रेक लागेको छ। लघुवित्तको लागातार मूल्य वृद्धि भइरहेको छ। गत साता कारोबारको लागि अन्तिम दिन पनि यसको मूल्यमा सकारात्मक सर्किट ब्रेक लागेको थियो। लघुवित्तको सेयर मूल्य बढेर एक हजार ६ सय ७२ रुपैयाँ ६० पैसामा अन्तिम कारोबार भएको छ।
यसबाहेक आज घलेम्दी हाइड्रो लिमिटेडको ८.८२ प्रतिशत र माउन्टेन इनर्जी नेपालको ८.६६ प्रतिशतले सेयर मूल्य बढेको छ। आज उन्नती सहकार्य लघुवित्त वित्तीय संस्थाको भने सबैभन्दा धेरैले सेयर मूल्य घटेको छ। कम्पनीको सेयर मूल्यमा ४.९२ प्रतिशतले कमि देखिएको हो।
कारोबार रकमको आधारमा आज सबैभन्दा धेरै रकमको कारोबार भएको कम्पनीमध्ये सिटिजन इन्भेस्टमेन्ट ट्रस्ट, हिमालयन डिस्टिलरी लिमिटेड, नबिल बैंक, एनआइसी एशिया बैंक, अरुण भ्याली हाइड्रोपावर लगायत हुन्।
आइतबार सिटिजन इन्भेस्टमेन्ट ट्रस्टको मात्रै ७ करोड ५३ लाख ५९ हजार रूपैयाँ, हिमालयन डिस्टिलरी लिमिटेडको ४ करोड ६० लाख ७८ हजार रूपैयाँ, नबिल बैंकको ४ करोड १५ लाख ४८ हजार रूपैयाँ, एनआइसी एशिया बैंकको ३ करोड ६७ लाख ९० हजार रूपैयाँ र अरुण भ्याली हाइड्रोपावरको ३ करोड ५८ लाख ८१ हजार रूपैयाँ कारोबार भएको हो।