वैशाख अन्त्यमा आइपुग्दा वाणिज्य बैंकहरूको प्रणालीबाट बाहिरिएको १९ अर्ब रूपैयाँमध्ये ८ अर्ब रूपैयाँ प्रणालीमै फर्किएको छ।
चैत मसान्तमा वाणिज्य बैंकहरूमा ४३ खर्ब ८८ अर्ब निक्षेप रहेकोमा वैशाख अन्त्यमा आइपुग्दा ४३ खर्ब ६९ अर्ब रूपैयाँ थियो। एक महिनामा करिब १९ अर्बले बाहिरिएको निक्षेप ६ जेठमा ८ अर्ब फर्किएर ४३ खर्ब ७७ अर्ब रूपैयाँ पुगेको छ।
निक्षेपमा वृद्धि भएसँगै बैंकहरूले एक आपसमा लिने अन्तर बैंक सापटीको ब्याजदर ७ प्रतिशतभन्दा तल ओर्लिएको छ। जेठको सुरूदेखि ७ प्रतिशत माथि रहेको यस्तो ब्याजदर यो अवधिमा दोस्रो पटक ६.९९ प्रतिशत कायम भएको हो।
वाणिज्य बैंकहरूको कर्जा लगानी पनि चैत यता १० अर्ब रूपैयाँले घटेको छ। जेठयता कर्जा लगानी करिब ५ अर्ब रूपैयाँले घटेको हो। ६ जेठमा बैंकहरूको कर्जा लगानी ४१ खर्ब ८७ अर्ब रूपैयाँ छ। गत वैशाख अन्त्यमा यस्तो लगानी ४१ खर्ब ९१ अर्ब र चैत अन्त्यमा ४१ खर्ब ९७ अर्ब रूपैयाँ थियो।
बैंक तथा वित्तीय संस्थाको कर्जा निक्षेप अनुपात (सिडी रेसियो) पनि ९०.२३ मा आइपुगेको छ। बैंकहरूले असार अन्त्यसम्म यो अनुपात ९० मा सिमीत पार्नुपर्छ।