प्राइम कमर्सियल बैंकले खुद नाफा ३१ प्रतिशत बढाएको छ। प्रकाशित तेस्रो त्रैमासिक वित्तीय विवरणअनुसार बैंकको खुद नाफा १ अर्ब ५४ करोड छ। गत वर्षको यस अवधिमा १ अर्ब १७ करोड कमाएको थियो।
बैंकको वितरणयोग्य नाफा १ अर्ब रहेको छ। बैंकको निक्षेप भने घटेको छ। चैत मसान्तसम्म ६८ अर्ब ६५ करोड निक्षेप संकलन गरेको छ। गत वर्ष सोही अवधिसम्म ७२ अर्ब निक्षेप संकलन गरेको थियो।
निक्षेप घटे पनि कर्जा प्रवाह बढेको छ। गत वर्षको चैतसम्म ६७ अर्ब कर्जा प्रवाह गरेकोमा अहिले ६९ अर्ब नाघेको छ। निक्षेप घट्दा पनि कर्जा प्रवाह बढेपछि बैंकको खुद व्याजवापतको आम्दानी बढेको छ। समीक्षा अवधिमा व्याजवापतको आम्दानी १ अर्ब ८३ करोडबाट २ अर्ब ६० करोड पुगेको छ। जसले नाफामा उल्लेख्य टेवा पुग्यो।
बैंकको निश्क्रिय कर्जा १. ०६ बाट बढेर १. ५८ पुगेको छ। बैंकले लिने र दिने व्याजको अन्तर अर्थात स्प्रेड दर भने घटाउन सफल भएको छ। अन्य बैंकको यस्तो दर बढेका बेला प्राइमको ४. २८ बाट ३. ७१ मा झरेको छ ।
बैंकको प्रतिसेयर आम्दानी २५ रुपैयाँ छ। सिसिडी रेसियोका आधारमा थप निक्षेप संकलन नभएसम्म कर्जा प्रवाह गर्न नसक्ने अवस्थामा बैंक देखिन्छ। यस्तो अनुपात ७८. ४ पुगेको छ।
बैंकको आधार व्याजदर ११ प्रतिशतबाट १० प्रतिशतमा घटेको छ। प्राइमको हालै ओम डेभलपमेन्ट बैंकसँग मर्ज प्रक्रिया तोडिएको छ।