बैंक तथा वित्तीय संस्थाहरुले अब कृषि, उद्यम तथा व्यवसाय प्रवर्द्धन कर्जाको लागि निवेदन प्राप्त भएको सात दिनभित्र स्वीकृत गर्नुपर्ने भएको छ।
निवेदन दिएको कयौं सातासम्म पनि बैंकहरुले स्वीकृत नगर्ने गरेको गुनासो आएपछि राष्ट्र बैंकले सोमबार एकीकृत निर्देशन जारी गरेको हो। यदी सात दिनभित्र कर्जा स्वीकृत गर्न नसकेमा सोको कारण स्पष्ट रुपमा ग्राहकलाई दिनुपर्नेछ।
हाल १५ लाख रुपैयाँसम्म यस्तो कर्जा प्रवाह हुँदै आएको छ। गाई, बाख्रा, कुखुरा, भैंसी पालन, खेती गर्न अन्य व्यवसाय गर्न यस्तो कर्जा पाइन्छ।
यस्तो कर्जामा आधार दरमा बढीमा दुई प्रतिशतभन्दा बढी व्याज असुल गर्न पाइने छैन। मोटरबाटो नभएको खेतीयोग्य जमिनलाई पनि बैंकहरुले धितोका रुपमा स्वीकार गर्न सक्ने छन्। यस्तो कर्जामा ऋणीले समय अगावै भुक्तानी गरेमा कुनै पनि सेवा शुल्क लिन पाइने छैन।