तनहुँ जलविद्युत आयोजनामा बैंक ग्यारेन्टीवापतकाे २ अर्ब रुपैयाँ नेपाल इन्भेस्टमेन्ट बैंकले फिर्ता ल्याएको छ।
इटालियन बैंक इन्टेसा सनपाओलोमार्फत बैंक ग्यारेन्टीको रकम प्राप्त भएको इन्भेष्टमेन्ट बैंकले जनाएको छ। एक विज्ञप्ति जारी गर्दै बैंकले रकम प्राप्त भएको जनाएको हाे।
ठेकेदार कम्पनी सिएमसीले बीचमै काम छोडेर भागेपछि यसअघि बैंकमार्फत जारी भएको ग्यारेन्टीवापतको रकम जोखिममा परेको थियो।
आयोजना निर्माणका लागि नेपाल इन्भेष्टमेन्टलाई इन्टेसा सनपाओलोले २ अर्ब बराबरको रकम बैंक ग्यारेन्टी जारी गरेको थियो।
यता, इन्भेष्टमेन्टले साे रकम प्रदान गरिसकेकाे थियाे। त्यसपछि ठेकेदार कम्पनी सिएमसीले बीचमै काम छोडेर भागेकाे थियाे। सिएमसी भागेपछि सो रकम तिर्नु नपर्ने भनी इटालीको अदालतमा मुद्दा दायर भएको थियो।
इटालीको अदालत ट्राइबुनले डि बोलोग्नाका तीन न्यायाधीशको संयूक्त इजलासले गत जुन ९ मा इन्टेसामार्फत इन्भेष्टमेन्टलाई रकम तिर्नुपर्ने फैसला गरेको थियो।
‘यो घटना नेपाली र अन्तर्राष्ट्रिय बैंकिङ अभ्यासको क्षेत्रको सकारात्मक विकास हो, बैंक ग्यारेन्टीजस्ता उपकरणको विश्वासलाई सुदृढ गर्दै यस प्रकारको ठूलो कोषलाई फिर्ता फिर्ता ल्याउन सकिन्छ’ इन्भेष्टमेन्टले जारी गरेको विज्ञप्तिमा भनिएको छ ‘अन्तर्राष्ट्रिय अदालतमा सुनुवाईको पहिलो चरणमा जारी गरिएको अन्तरिम आदेशलाई सफलतापूर्वक चुनौती दिएपछि आजसम्म नेपाली बैंकिङ इतिहासमा सफलतापूर्वक बैंक ग्यारेन्टी रकम फिर्ता लिएको यो पहिलो उदाहरण हो।’