दोर्दी खोला जलविद्युत कम्पनी लिमिटेडले सर्वसाधारणका लागि आइपिओ निष्कासन गर्ने भएको छ। कम्पनीले आउँदो जेठ २६ गतेदेखि २१ लाख ९५ हजार ५०९ कित्ता सेयर जारी गर्ने भएको हो।
आवेदकहरूले प्रति कित्ता एक सय रूपैयाँको दरमा न्यूनतम १० कित्ता र अधिकतम १७ लाख कित्तासम्म सेयर भर्न सक्नेछन्। आवेदन छिटोमा जेठ ३१ गतेसम्म दिन सकिनेछ। माग बमोजिमको आवेदन नपरेमा भने ढिलोमा असार ९ गतेसम्म आवेदन दिन सकिनेछ।
जारी गरिएको कित्तामध्ये कम्पनीले ३ प्रतिशत अर्थात् ६५ हजार ८६५ कित्ता सेयर कम्पनीको कर्मचारीहरूको लागि र ५ प्रतिशत अर्थात् एक लाख ९ हजार ७७५ कित्ता सेयर सामुहिक लगानी कोषको लागि छुट्याएको छ। यीबाहेक बाँकी २० लाख १९ हजार ८६९ सय कित्ता सेयर सर्वसाधारणको लागि जारी हुनेछ।
आइपिओ जारी भएसँगै कम्पनीको चुक्ता पुँजी एक अर्ब ५ करोड पुग्ने बताइएको छ।
यसभन्दा अघि कम्पनीले आयोजना प्रभावित लमजुङ जिल्लाका स्थानीयहरूका लागि १० लाख ५४ हजार २६० कित्ता सेयर जारी गरेको थियो। त्यसमध्ये ७१.७५ प्रतिशत (७ लाख ५६ हजार ४२० कित्ता) सेयर बाँडफाँट भएको थियो।
यसबाट बाँकी रहेको २ लाख ९७ हजार ८४० कित्ता सेयरसहित २१ लाख ९५ हजार ५०९ कित्ता सेयर अहिले सर्वसाधारणको लागि जारी गरिएको हो।
कम्पनीको धितोपत्र निष्कासन तथा बिक्री प्रबन्धक सिद्धार्थ क्यापिटल रहेको छ। कम्पनीलाई इक्रा नेपाल लिमिटेडले बिबी माइनस ग्रेडिङ दिएको छ।
दोर्दी खोला जलविद्युत कम्पनी लिमिटेड नेपालमा जलविद्युत आयोजनाको विकास र लगानी गर्ने उद्देश्यले फागुन १४, २०६६ मा स्थापित सार्वजनिक कम्पनी हो। यसले हाल लमजुङ जिल्लामा १२ मेगावाटको दोर्दी-१ जलविद्युत आयोजना निर्माण गरिरहेको छ।
यसको उत्पादन अनुमति २१०४ पुस ११ गतेसम्म छ। हाल कोभिड-१९ को प्रभावका कारण आयोजनाले व्यावसायिक उत्पान अनुमति मिति बढाइदिन प्राधिकरणलाई पत्रचार गरिहरको छ। २०७७ साउन २ मा आयोजनाले व्यवसायिक उत्पादन थाल्ने लक्क्ष लिएको भएपनि असफल भएको हो।
आयोजनाको औसत ९२.९२ प्रतिशत भौतिक तथा वित्तीय काम सम्पन्न भएको आवहान पत्रमा उल्लेख छ। कम्पनीको संस्थापक सेयरधनीको रूपमा सिइडिभी हाइड्रो, राधी विद्युत, लमजुङ विकास र खारे इन्भेस्टमेन्ट लगायतका कम्पनीहरू छन्।
आयोजना दोर्दी गाउँपालिका-६ लमजुङमा छ। यसको दर्ता कार्यालय काठमाडौं-११, ब्लुस्टार कम्प्लेक्स, त्रिपुरेश्वरमा छ। कम्पनीमा लमजुङ विद्युत विकास कम्पनी लिमिटेडको ८४.९५ प्रतिशत स्वामित्व रहेको छ।
