नबिल बैंकले नेपालमै पहिलो पटक एपमा आधारित 'नबिल जेन अल्फा' बचत सञ्चालनमा ल्याएको छ।
अभिभावक र बालबच्चा दुवैले नबिल बैंकमा खाता खोलेर यो योजनामा सहभागी हुन सक्नेछन्।
यस्तो खाता खोलेपछि अभिभावक र बच्चा दुवैले बैंकको एपमा पहुँच पाउँनेछन्। यस्तो खाता अनलाइनबाट पनि खोल्न सकिने व्यवस्था गरिएको छ।
एपमा अभिभावकले आफ्नो बालबच्चाको व्यक्तिगत र सामाजिक बानी विकासको लागि विभिन्न कार्य तोक्न सक्नेछन्। यस्ता कामको मूल्य समेत अभिभावकले तोक्न सक्छन्।
यसरी तोकिएको काम सम्पन्न गरेको आधारमा अभिभावकले निश्चित रकम आफ्नो बच्चाको खातामा पठाउन सक्छन्।
अभिभावकको रकमान्तरको यस्तो आदेश बैंकलाई दिएर बैंकले नै एप मार्फत् बच्चाले पुरा गरेको कामको आधारमा रकम बच्चाको खातामा जम्मा गरिदिन पनि सक्छ।
'आफ्ना बालबालिकालाई घरायसी काम सिकाउन, गृहकार्य गराउन, शारीरिक सरसफाइमा अभिप्रेरित गर्ने कामहरू गराएर उनीहरूलाई त्यसबापत अभिभावकले प्रतिफल दिने यो योजनाले हामी जस्ता बालबालिकालाई सामाजिक र आर्थिक मितव्ययिताको ज्ञान समेत हुने देखिन्छ,' नबिल बैंकका बाल एम्बेसडर तथा बाल उत्प्रेरक प्रेन्सा रेग्मीले भनिन्।
१८ वर्षभन्दा कम उमेरका बालबालिका लक्षित यो बचत खाताले बालबच्चाको सामाजिक बानी विकासमा समेत सघाउ पुग्नेछ।
'हामीले केही समयअघि नै यो एप निर्माण गरेका भएपनि बालदिवसको अवसरमा यो सार्वजनिक गरेका हौं,' बैंकका प्रमुख कार्यकारी अधिकृत ज्ञानेन्द्रप्रसाद ढुंगानाले भने, 'यो खाताले बालबालिकालाई जीवन उपयोगी अध्ययन त हुने नै छ, यसले बैंकहरुमा देखिएको तरलता समस्या समेत कम गर्न केही न केही सहयोग पुग्नेछ।'
यस्तो बचत खातामा ६.०३ प्रतिशत ब्याजदर हुनेछ। बच्चाको बचत ३० हजारभन्दा धेरै पुगेपछि सोही खातामा १० हजार रहनेगरि बाँकी रकम बैंकले सञ्चयी (क्युमुलेटिभ) मुद्दती खातामा जम्मा गरिदिनेछ। यस्तो खातामा भने ९.०३ प्रतिशत ब्याज प्राप्त हुनेछ।
'हामीले सदैव सामाजिक, वातावरणीय काममा आफूलाई अग्रस्थानमा राखेका छौं, त्यसैले नबिललाई सबैले आफ्नो बैंक बनाएर सहयोग गर्नुपर्छ,' बैंकका अध्यक्ष उपेन्द्र पौड्यालले बताए।
