धितोपत्र बोर्डले हालै चार वटा कम्पनीलाई प्राथमिक सेयर (आइपिओ) निष्कासन गर्न अनुमति दिएको छ।
बोर्डले गत पुस ७ गते मकर जितुमाया सुरी हाइड्रोपावर, सानिमा मिडल तमोर हाइड्रोपावरलाई आइपिओ जारी गर्न स्वीकृति दिएको हो।
त्यस्तै, पुस ४ गते बिपिडब्लु लघुवित्त वित्तीय संस्थालाई र पुस १७ गते सगरमाथा जलविद्युत कम्पनीलाई पनि स्वीकृति दिएको हो।
मकर जितुमाया सुरी हाइड्रोपावर
कम्पनीले ३० प्रतिशत सेयर स्थानीय र सर्वसाधारणमा जारी गर्ने भएको हो।
कम्पनीले २२ लाख ८० हजार कित्ता (२२ करोड ८० लाख रूपैयाँ) सेयर जारी गर्ने भएको हो। सेयर जारीपछि कम्पनीको चुक्ता पुँजी ७६ करोड रूपैयाँ पुग्छ। कम्पनीको सेयर बिक्री प्रबन्धकमा प्रभु क्यापिटल छ।
कम्पनीले मे २०२२ मा ६.४ मेगावाटको सुरी खोला हाइड्रोपावर सञ्चालनमा ल्याएको छ। त्यस्तै, ७ मेगावाटको अप्पर सुरी खोला हाइड्रोपावरको आयोजना निर्माण गरिरहेको छ।
सन् २०१८ अप्रिलमै सञ्चालनमा आउने भनिएको सुरी खोला आयोजना हालै मात्र सञ्चालनमा आएको हो। प्रति मगावाट २० करोड ५० लाख लागत लागेको यो आयोजना एक अर्ब ३१ करोड रूपैयाँमा निर्माण भएको हो।
अप्पर सुरी खोला हाइड्रोपावरको प्रतिमेगावाट लागत १८ करोड ५० लाख अनुमान गरिएको छ। अप्रिल २०२३ मा व्यवसायिक उत्पादनको लागि मिति तोकिएको यो आयोजनाको ६४ प्रतिशत भौतिक काम सम्पन्न भइसकेको छ।
६९.५ प्रतिशत ऋण र ३०.५ प्रतिशत सेयर लगानीबाट आयोजना बनाउन लागिएको हो। यसको मुख्य प्रवर्द्धकमा १६ वर्षदेखि जलविद्युत र निर्माण क्षेत्रमा लागेका हिमाल गुरूङ छन्। कम्पनीले रेटिङ कम्पनी केयर नेपालबाट जोखिमको आधारमा मध्यम मानिने संकेत बिबी रेटिङ पाएको छ।
सानिमा मिडल तमोर हाइड्रोपावर
कम्पनीले ८३ करोड ३१ लाख रूपैयाँ बराबरको सेयर स्थानीय र सर्वसाधारणमा जारी गर्न लागेको हो।
सेयर जारीपछि कम्पनीको चुक्ता पुँजी तीन अर्ब ३३ करोड रूपैयाँ पुग्नेछ। कम्पनीको सेयर बिक्री प्रबन्धकमा सानिमा क्यापिटल रहेको छ।
ताप्लेजुङ तमोर नदीमा बन्न लागेको यो ७३ मेगावाटको आयोजनाको लागत १३ अर्ब ३३ करोड रूपैयाँ रहेको छ। आयोजना ७५ प्रतिशत ऋण र २५ प्रतिशत सेयर पुँजीबाट निर्माण हुनेछ।
२९ डिसेम्बर २०२२ सम्म आयोजनाको भौतिक निर्माण प्रगति ७७ प्रतिशत भएको छ। २६ भाद्र २०८० गते व्यवसायिक उत्पादनको लागि मिति तोकिएको छ। यो आयोजनाबाट उत्पादन हुने विद्युत ढुङ्गेसाँगु (हाङपाङ)मा हाल निर्माणाधिन २२० केभी प्रसारण लाइनमा जोडिनेछ। यसको मुख्य प्रवर्द्धकहरूमा विनय कुमार श्रेष्ठ, डा. सुवर्ण दास श्रेष्ठ रहेका छन्।
सगरमाथा जलविद्युत कम्पनी
कम्पनीले ५४ करोड ८८ लाख रूपैयाँ बराबरको सेयर स्थानीय र सर्वसाधारणमा जारी गर्न लागेको हो। सेयर जारीपछि कम्पनीको चुक्ता पुँजी एक अर्ब १२ करोड रूपैयाँ पुग्नेछ। कम्पनीको सेयर बिक्री प्रबन्धकमा प्रभु क्यापिटल रहेको छ।
जुन २०२२ बाट कम्पनीले इलाममा बनाएको सुपर माइ ए हाइड्रोपावरबाट विद्युत उत्पादन भइरहेको छ। ९.६ मेगावाटको आयोजना सञ्चालन गरिरहेको यो कम्पनीले पाएको उत्पादन मितिभन्दा सात महिनाअघि नै विद्युत उत्पादन गरेको हो।
एक अर्ब ७७ करोडमा आयोजना निर्माण सम्पन्न भएको हो। कम्पनीमा मुख्य प्रवर्द्धक न्यादी ग्रुप पावरको ६१ प्रतिशत, राजेन्द्र गौतमको १९ प्रतिशत सेयर रहेको छ।
बिपिडब्लु लघुवित्त वित्तीय संस्था
कम्पनीले ९७ लाख रूपैयाँ बराबरका सेयर जारी गर्न लागेको हो। सेयर जारीसँगै कम्पनीको चुक्ता पुँजी तीन करोड रूपैयाँ पुग्नेछ। कम्पनीको सेयर बिक्री प्रबन्धकमा मेगा क्यापिटल रहेको छ।
वित्तीय कारोबार गर्ने गैरसरकारी संस्थाबाट लघुवित्तमा परिणत भएको यस कम्पनी हाल ७१ जना व्यक्तिगत संस्थापक छन् भने एउटा संस्था बिपिडब्लु पाटन संस्थापकको रूपमा छ।
बनेपाबाट सञ्चालनमा आएको यस कम्पनीको नायव कार्यकारी अधिकृतमा प्रदिप कोइराला छन्।
गत आर्थिक वर्ष २०७८/७९ को दोस्रो त्रैमासमा कम्पनीले दुई हजार चार सय १९ जनालाई १९ करोड ५० लाख कर्जा लगानी गरेको थियो। कम्पनीले यो अवधिमा ४६ लाख ९० हजार खुद नाफा गरेको छ। कम्पनीको कुल खराब कर्जाको दर ३.५० प्रतिशत छ।