केही महिनाअघि नेपालका हिमालहरूको आरोहण गर्ने क्रममा अचेत भएकी एक जर्मन पर्वतारोही मार्टिना कुसले थापाथलीस्थित नर्भिक अस्पतालको उपचार सेवाको प्रशंसा गरेकी छिन्।
नर्भिकको उपचार सेवाबाट मृत्युको मुखबाट फिर्ता हुन सफल उनले स्वदेश फर्किएपछि त्यहाँको एउटा सञ्चारमाध्यममा आफ्नो अनुभव साट्दै नर्भिकको उपचार पद्धतिको प्रशंसा गरेकी हुन्।
सन् २०२२ नोभेम्बरमा मार्टिना कुस सगरमाथा आरोहणको उद्देश्यले नेपालको तस्रो पटकको भ्रमणमा आएकी थिइन्।
तर, चार हजार मिटरको उचाईबाट अगाडि बढ्दै गर्दा उनलाई लेक लाग्यो। स्वास्थ्यमा अनपेक्षितका समस्या एकाएक देखिए।
लुक्लाबाट अगाडि बढेको केही दिनपछि उनलाई गम्भीर स्वास्थ्य समस्या देखिएको थियो। मार्टिनाका अनुसार उनलाई पल्मोनरी एम्बोलिज्मको समस्या देखिएको थियो।
यसअघि पनि नेपालमा हिमालहरूको आरोहण गरिसकेकी उनले यसपटक भने स्वास्थ्यले साथ दिएन।
उनलाई हिमाली क्षेत्रबाट हेलिकोप्टरमार्फत उद्धार गरी काठमाडौंकै एउटा निजी अस्पतालमा उपचार गरिएको थियो।
मार्टिनाले लेखेअनुसार त्यहाँ उनको स्वास्थ्य अवस्था झनै बिग्रियो। त्यसपछि चिकित्सक र टूर गाइडको सल्लाहअनुसार थापाथलीस्थित नर्भिक अस्पताल पुर्याइएको थियो।
उनले भनिन् 'सिटी स्क्यानले पल्मोनरी एम्बोलिज्मको समस्या रहेको पत्ता लगायो। डाक्टरहरूले मेरो फोक्सोमा पानी र रगत भेट्टाए। एम्बोलिज्म हुँदा रगत जम्छ र यदि त्यो रक्तनलीमा अड्कियो भने मृत्यु हुन सक्छ। निमोनिया पनि भयो।'
उनले स्मरण गर्दै भनेकी छिन्- 'त्यो सानो अस्पतालले मलाई थप उपचारको लागि काठमाडौंको ठूलो नर्भिक अस्पतालमा सार्यो। केही दिनपछि औषधि आयो र ज्वरो कम भयो। खान र पिउन मुश्किलले सक्ने भएँ।'
उनले नर्भिकको उपचार पद्दति, चिकित्सक तथा नर्सहरूको आत्मीय व्यवहार ‘अविश्वसनीय’ रहेको उनले उल्लेख गरेकी छन्।
'नर्भिकका डाक्टरहरूद्वारा गरिएको चिकित्सा उपचार अविश्वसनीय थियो र नर्सिङ स्टाफको सहानुभूति र हेरचाह महान थियो। मेरो हेरचाह गर्न, मलाई सान्त्वना दिन र मलाई अँगालो हाल्न एक नर्स लगभग चौबीसै घण्टा त्यहाँ तैनाथ हुन्थिन्' उनले भनिन्
उनले थपिन् 'बिरामी भएर बेडमा लडिरहँदा निराश थिएँ। तर, नर्भिकका डाक्टर र नर्सको मीठो व्यवहारले मेरो दिमागमा सकारात्मक सोचको विकास हुन थाल्यो। आफ्नै घरमा बसेर उपचार गरिरहेको जस्तो लाग्न थाल्यो। अर्को शब्दमा भन्दा नर्भिकका डाक्टर र नर्स मेरा लागि भगवान बने।'
उनी नर्भिक अस्पतालमा ४५ दिनसम्म बसेकी थिइन्। सो अवधिमा पूर्ण रुपमा ठीक भएपछि उनी जर्मनीका लागि उडेकी थिइन्। उनलाई लिन नेपालमा उनका भाई आएका थिए।
हाल घरमै थप स्वास्थ्य लाभ गरिरहेकी मार्टिनाले फेरि पनि आफूलाई नेपाल भ्रमणमा जाने उत्कट इच्छा रहेको समेत सो क्रममा बताएकी छिन्।
'म सँग नेपाल र यात्राको सकारात्मक सम्झनाहरू छन्। म त्यहाँ चौथो पटक पक्कै जान्छु। मलाई अग्लो हिमाल चढ्नु पर्दैन।' उनले लेखेकी छिन् 'नेपालमा हिमालयको बीचमा सजिलो पदयात्रा, सांस्कृतिक अनुभव वा विश्रामका लागि प्रभावशाली क्षेत्रहरू पनि छन्।'
