प्रतिनिधि सभाको आइतबारको बैठकमा प्रधानमन्त्री केपी शर्मा ओलीले नीति तथा कार्यक्रममाथि छलफलका क्रममा सांसदहरूले उठाएका प्रश्नमा केन्द्रित रहेर जबाफ दिए।
प्रधानमन्त्रीको जबाफ चित्तबुझ्दो नभएमा स्पष्टीकरण सोध्न सांसदलाई समय पनि दिइएको थियो।
नेकपा (माओवादी केन्द्र) का सांसद हितराज पाण्डेले प्रधानमन्त्री ओलीलाई प्रश्न सोधे- राष्ट्रिय गौरबको बूढीगण्डकी जलविद्युत आयोजना निर्माण यसै आर्थिक वर्ष २०८२/०८३ मै सुरू गर्नेबारे सरकारको के योजना छ?
जबाफमा प्रधानमन्त्री ओलीले त्यसको आधार पुगिनसकेकोले यसै वर्ष सुरू हुने वा नहुने भन्न नसक्ने बताए।
कस्तो खालको आयोजना बनाउने हो भन्नेजस्ता आधार तयार नभएकोले यसै वर्ष बनाउन सकिन्न कि भन्ने प्रधानमन्त्रीको जबाफ थियो। तर पनि उक्त आयोजना बनाउने र खेर जान नदिइने प्रधानमन्त्री ओलीले बताए।
गोरखा १ का सांसद राजेन्द्र बजगाईंले पनि प्रधानमन्त्रीको उक्त अभिव्यक्तिबारे चासो राख्दै प्रधानमन्त्रीलाई प्रश्न गरेका थिए।
‘प्रधानमन्त्रीज्यूसँग अलगै रूपमा भेट गरी बूढीगण्डकी आयोजनाको विषयमा चिन्ता व्यक्त गर्दा उहाँले सम्बन्धित निकायहरूले आवश्यक अध्ययन, परियोजनाको सम्भाव्यता प्रतिवेदन तथा आन्तरिक र बाह्य स्रोतहरूको भरपर्दो आधार तयार नगरेको हुँदा नेपालले एक्लै यो आयोजना अगाडि बढाउन नसक्ने धारणा व्यक्त गर्नुभएको छ,’ सांसद बजगाईले भने।
