राष्ट्रिय जनता पार्टी नेपालले दल दर्ताका लागि निवेदन दिएको छ। राजपाका अध्यक्ष मण्डलका नेताहरुले निर्वाचन आयोग पुगेर दल दर्ताका लागि निवेदन दिएका हुन्।
राजपा अध्यक्ष मण्डलका नेता राजेन्द्र महतोले दल दर्ताका लागि निवेदन दिएको सेतोपाटीलाई बताए। उनले विधानमा देखिएको सबै विवाद समाधान भएको दाबी समेत गरे।
बुधबार नै दल दर्ताको तयारी गरेका भएपनि राजपामा विधानमा को को नेताहरुको नाम लेख्ने भन्ने विवाद भएको थियो। राजपा बन्नुअघि संघीय सद्भावना पार्टीका अध्यक्ष रहेका अनिल झाले पार्टीको विधानमा गजेन्द्रनारायण सिंहको नाम राख्नुपर्ने अडान लिएका थिए।
महतोले सबैको नाम राख्ने सहमतिपछि दर्ताका लागि निवेदन दिइएको बताए।
राजपाका अध्यक्ष मण्डलका अर्का नेता राजकिशोर यादवले भने सर्वसम्मतले विधान पारित गरेर दल दर्ता गरिएको बताए। 'विवाद भनेर मिडियामा आयो। हामीले त्यसलाई चिर्नकै लागि सबै अध्यक्ष निर्वाचन आयोग पुगेर जवाफ दियौँ', यादवले भने, 'सशरीर उपस्थित भयौँ। छलफल गर्दा पनि विवाद देख्ने? उनले विधानमा पार्टीको सञ्चालन गर्ने वैचारिक र रणनीतिक लाइन राखिएको छ।
'हामीले गजेन्द्र नारायण सिंह लगायतको नाम राख्ने विषयमा कुनै कमि गरेको छैन', उनले भने, 'घोषणापत्रको छुट्टै प्याराग्रााफमा क्रान्तिका र उहाँहरुको योगदानबारे उल्लेख छ।' उनले विधान र घोषणापत्र दुबै सँगै तयार गरिएको समेत बताए।
निर्वाचन अायोगका प्रवक्ता सूर्यप्रसाद शर्माले राजपाले अायोगमा निवेदनका साथै विधान र घोषणापत्र बुझाएको र अायोगले अब त्यो अध्ययन गर्ने बताए। 'अाज उहाँहरूले निवेदन दिएर जानुभएको छ अब अायोगले उहाँहरुको विधान र घोषणा पत्रमा केही नपुग भए पुर्याउन भन्छ अनि पार्टी अौपचारिक रूपमा दर्ता हुन्छ', शर्माले भने।
