नेकपा माओवादी केन्द्रका सांसद मात्रिका यादवले निवर्तमान प्रधानमन्त्री केपी शर्मा ओलीबारे गरेको टिप्पणी संसदको रेकर्डबाट मेटाइएको छ।
यादवले साउन २८ गते विशेष समयमा निवर्तमान प्रधानमन्त्री ओली ‘मेन्टल्ली र फिजिल्ली फिट नभएको’ टिप्पणी गरेका थिए।
यादवको टिप्पणीबारे प्रमुख प्रतिपक्षी दल एमालेले संसदमा उभिएर विरोध जनाएपछि सभामुख अग्निप्रसाद सापकोटाले शब्द हटाउन रुलिङ गरा हुन्।
एमालेका प्रमुख सचेतक विशाल भट्टराईले ‘अमर्यादित भाषा प्रयोग गरेको’ विषयमा सभामुखले ध्यानाकर्षण भएको बताए पनि नहटाएकोमा आपत्ति जनाएका थिए।
एमालेका सांसदहरुले उभिएर विरोध गरेपछि सापकोटाले भट्टराईलाई समय दिएका थिए।
‘एक जना माननियले अर्को माननियलाई इङ्गित गरेर गाली गर्ने हो भने यो संसद कस्तो बन्ला’, भट्टराईले भने, ‘एमालेको तर्फबाट ध्यानाकर्षण गराउन चाहान्छु। हिजो प्रयोग गरिएका असंसदीय शब्दहरु हटाउन जोडदार माग गर्दछु।’
भट्टराईको मागपछि सभामुख सापकोटाले रुलिङ मार्फत् ती शब्द हटाउन आदेश दिएका हुन्।
अब प्रतिनिधि सभाको बैठकमा भएका छलफलहरु उतार्ने क्रममा ती शब्दहरु हटाइनेछन्। प्रतिनिधि सभा बैठकमा सांसदहरुले बोलेका तथा काम कारबाहीहरु उतारेर रेकर्डमा राख्ने गरिन्छ।
