नेपाली कांग्रेसले अमेरिकी सहयोग परियोजना (एमसिसी) र प्रधानन्यायाधीश चोलेन्द्र शमशेर राणामाथि लगाइएको महाअभियोग पारित गर्न आव्हान गर्ने निर्णय गरेको छ।
मंगलबार बसेको संसदीय दलको बैठकले एमसिसी र महाअभियोगलाई संसदबाट पास गर्नुपर्ने निष्कर्ष निकालेको कांग्रेस सांसद डिला संग्रौलाले जानकारी दिइन्।
बैठकमा उपस्थित सबै सांसदले एमसिसी अगाडि बढाउनुपर्ने धारणा राखेको बताएका थिए।
बैठकमा नेता रामशरण महतले एमसिसी देशको हितमा भएका कारण यसलाई कार्यान्वयन गर्नुपर्ने बताएका थिए।
उनले करिब १ घन्टा एमसिसीका बारेमा सांसदहरूलाई बुझाएका थिए।
एमसिसी बारे कांग्रेस नेताको प्रतिक्रिया
नेपाली कांग्रेसका नेता शशांक कोइरालाले बुधबार (भोलि) बोलाइएको प्रतिनिधि सभाको बैठकमा एमसिसी पेस हुनसक्ने बताएका छन्।
मंगलबार नयाँ बानेश्वरस्थित संसद भवनमा आयोजित संसदीय दलको बैठकपछि सञ्चारकर्मीसँग कुरा गर्दै नेता कोइरालाले यस्तो बताएका हुन्।
उनले एमसिसी नेपालका लागि राम्रो भएकाले पारित गरिनुपर्ने पार्टीको धारणा रहेको बताए। नेता कोइराला ले एमसिसी को रुपरेखाहरू नेपाल सरकारले नै बनाउने कुरा बैठकमा छलफल गरिएको समेत स्पष्ट पारे।
‘रामशरण महतज्यूले एमसिसी नेपालको लागि राम्रो हो भनेर ब्रिफिङ गर्नुभयो। ९ वटा देशमा त्यस्तै कार्यक्रमहरु चलिरहेको छ। त्यहाँ कुनै अमेरिकाको सेनाहरु पनि आएका छैनन्। यसको रूपरेखा नेपाल सरकारले गर्ने हो भन्ने छ। भोलिको बैठकमा पेस हुनसक्ने सम्भावना छ’, उनले भने, ‘बैठकको निस्कर्ष निस्किसकेको छैन। तर एमसिसी पास गर्नुपर्छ भन्ने कुरा हो। बैठकमा रामशरण महतजीले नेपालको लागि एमसिसी राम्रो हो। यहाँ अमेरिकाको सेना आउँदैन, उसले यहाँ हस्तक्षेप गर्दैन भन्ने कुराहरु राख्नुभएको छ।’
त्यस्तै पूर्वअर्थमन्त्री तथा नेपाली कांग्रेसका नेता रामशरण महतले एमसिसी राष्ट्रिय हितमा रहेकाले कुनै पनि हालतमा पारित गर्नुपर्ने बताए। उनले एमसिसीबारे गलत आलोचना गरेर शक्तिशाली र सहयोगी राष्ट्रसँगको सम्बन्धमा दखल गर्न खोजिएको आरोपसमेत लगाए।
‘एमसिसी राष्ट्रको हीतमा छ। यसलाई गलत चर्चा, गलत आलोचना गरेर भ्रमपूर्ण आलोचना गरि रोक्नु राष्ट्रको हितविपरीत हुन्छ। अमेरिका जस्तो शक्तिशाली राष्ट्र र नेपाललाई सबैभन्दा बढी सहयोग गर्ने मुलुकसँग सम्बन्ध बिगार्ने काम बिल्कुलै गर्नु हुँदैन’, उनले भने, ‘एमसिसी यही बैठकबाट पारित हुनुपर्छ। फागुन १६ गतेभित्र पारित भएन भने सहयोग नहुन पनि सक्छ।’
नेता महतले एमसिसी पारित गरेमा राष्ट्रको आर्थिक वृद्धि हुने, रोजगारीका अवसरहरु बढ्ने र पूर्वाधारको विकास हुने पनि बताए। उनले एमसिसी को बारेमा अमेरिकी सेनासँग सम्झौता हुने लगायतका भ्रमपूर्ण प्रचार गरिएको भन्दै एमसिसी नेपालको कानून अनुसार सम्झौता गरिएको दाबी गरे।
‘एमसिसी कुनै पनि हालतमा पारित गर्न जरुरी छ। यो पारित गर्दा राष्ट्रको हीत, राष्ट्रको आर्थिक वृद्धि हुनेगरी निवारण गर्ने, रोजगारीका अवसरहरू बढ्ने, लगानी बढ्ने, पूर्वाधारको विकास भएपछि आगामी वर्षहरूमा विद्युतको उत्पादन बढ्दै जान्छ’, उनले भने, ‘त्यसले नेपालको आवश्यक्ता पूरा हुन्छ। साथै ठूलो मात्रामा एक्सपोर्ट गर्नुपर्ने जरूरी छ। यसलाई जसरी भए पनि पास गर्नुपर्छ।’
उनले बीआरआई र इण्डोप्यासिफिक रणनीतिसँग एमसिसी को कुनै सम्बन्ध नरहेको बताए। नेता महतले एमसिसी सहयोग कुनै पनि मुलुकको हीत विपरित नभएको दाबीसमेत गरे।
‘यसमा गलत खालका आलोचनाहरु गरेका छन्। मिलिट्री सम्झौता हुन्छ, अमेरिकी सेना आउँछ भन्ने त्यो सरासर गलत हो। यो इण्डोप्यासिफिक रणनीति अन्तर्गत पनि होइन। नेपालको कानून विपरित पनि छैन। दुई देशको बीचमा सहमतिअनुसार भएको सम्झौता कानूनअनुसार नै हो,’ उनले भने, ‘एमसीए अफिस नेपालको कानूनबमोजिम नेपालका सरकारी कर्मचारीहरु भएको एमसीएले कार्यान्वयन गर्छ। आलोचना एमसिसी ले हस्तक्षेप गर्छ यता उति भन्ने छ त्यो सम्भावना छैन। यसमा इन्टेलिजेन्ट प्रपर्टी राइट पनि नेपालको नै छ। आरोपहरु भ्रमपूर्ण छन्। यो अमेरिकासँग सम्बन्ध बिगार्न भएको प्रयास हो।’
नेपाली काँग्रेसकी नेतृ सुजाता कोइराला ले एमसिसी पास गर्न ढिलाइ गर्न नहुने बताइन्। उनले एमसिसी लाई सबै दलले अघि बढाएको बताउँदै विकासको योजना सबै दलले मिलेर पास गर्नुपर्ने धारणा राखिन्।
‘एमसिसी हामीले टेबुल गरेर पारित पनि गर्नुपर्छ। यो एउटा सहयोग हो। अनुदानलाई लिन्न भन्दा राम्रो देखिँदैन’, उनले भनिन्, ‘अन्तर्राष्ट्रिय सम्बन्ध पनि बिग्रेर जान्छ। हाम्रो यति लामो समयदेखिको सम्बन्ध छ विभिन्न देशहरुसँग त्यो बिग्रिन्छ। त्यसले नेपाललाई धेरै नै क्षति पुर्याउँछ। अब धेरै ढिलो गर्नुहुँदैन।’
उनले अनुदान लिन्न भन्नु हाँस्यास्पद भएकोले अन्तर्राष्ट्रिय सम्बन्धलाई राम्रो बनाइराख्न एमसिसी टेबुलबाट पास गर्नुपर्ने बताइन्। उनले नेपालमा ठूला अनुदान भित्र्याउन नदिने याड्यन्त्रकारी शक्ति रहेको भन्दै यसलाई हरेक पार्टीले समर्थन गरेर पास गर्नुपर्ने बताइन्।
‘एमसिसी एउटा अनुदान हो र यसले नेपालका लागि दीर्घकालीन सहयोग पुर्याउँछ। कुनै पनि विकासको योजनालाई लिन्न भन्दा एकदमै हाँस्यास्पद हुन्छ’, उनले अगाडि भनिन्, ‘एउटा यस्तो समुदाय छ नेपालमा जसले विकास नै हुन दिँदैन। कुनै पनि ठूला योजना आउन दिँदैन। जहिले पनि यसलाई बिगार्ने षड्यन्त्र हुन्छ। यो आयोजना हरेक पार्टीको प्रधानमन्त्रीले अघि बढाएको छ। हरेक पार्टी र त्यसबाट बनेका प्रधानमन्त्रीले यो लिन्न यो स्वीकार्य हुन्न भन्नु हुँदैन। उहाँहरुले यसमा सहयोग गर्नुपर्छ।’
नेतृ कोइरालाले एमालेसहितका सबै दलहरुले सरकारमा रहँदा एमसिसी पास गर्नुपर्ने कुरा अघि सारेकोले अहिले विरोध गरेर दोहोरो चरित्र देखाउन नहुने बताइन्। उनले नेपाललाई एमसिसी ले कब्जा गर्न नसक्ने पनि बताइन्।
‘अब यसलाई धेरै ढिला नगरौँ, धेरै बहस गरेर समस्यालाई झनै बल्झाउन नथालौं। यसलाई चाँडो पास गरेर समस्याको समाधान खोजौं। कसैले नेपाललाई कब्जा गर्न सक्दैन। आजको दिनसम्म कसैलाई कब्जा गर्न दिएनौं,’ उनले भनिन्।