सभामुख अग्निप्रसाद सापकोटाले भ्रष्टाचार नियन्त्रणका लागि क्षेप्यास्त्र हुने गरी कार्टुनहरू बनाउन आग्रह गरेका छन्।
आज काठमाडौंको बबरमहलस्थित नेपाल आर्ट काउन्सिलमा सुरू भएको प्रदर्शनीमा सापकोटाले भ्रष्टाचारविरूद्ध अझै धेरै कार्टुनहरू बनाउन कार्टुनिष्टहरूलाई आग्रह गरेका थिए।
भ्रष्टाचार मुलुकको सबैभन्दा गम्भिर समस्या भएको उल्लेख गर्दै सभामुख सापकोटाले त्यसको विरुद्ध निशाना नसोझ्याउने हो भने मुलुकलाई नै सिध्याईदिने बताए।
उनले आफूले जानेर दुई पैसा पनि भ्रष्टाचार नगरेको भन्दै भ्रष्टाचारविरुद्धको अभियानमा सधै साथमा रहने प्रतिवद्धता व्यक्त गरेका थिए।
‘भ्रष्टाचारलाई अहिले निर्मूल त भनि नहालौं । नियन्त्रण गर्न सकिएन भने यसले भित्रभित्रै हाम्रो राष्ट्रलाई सिध्याउँछ,’ उनले भने।
उनले आफू सभामुख भएदेखि नै सहज रूपमा काम गर्ने वातावरण नपाएको बताएका थिए।
