नेपाली कांग्रेसका लुम्बिनी सभापति अमरसिंह पुन मगरले प्रदेश पार्टीले गरेका कतिपय निर्णयमा केन्द्रले हस्तक्षेप गर्ने गरेको बताएका छन्।
सोमबारदेखि पार्टी केन्द्रीय कार्यालय सानेपामा जारी केन्द्रीय कार्यसमिति बैठकमा बोल्दै उनले वैशाख ३० मा भएको स्थानीय चुनावका लागि उम्मेदवार छान्दा केन्द्रले हस्तक्षेप गरेको बताए।
‘टिकट बाँड्न काममा केन्द्रले हस्तक्षेप गर्यो। उपमहानगरको वडाको टिकट केन्द्रले दियो,’ उनले केन्द्रीय समिति बैठकमा भने, ‘प्रदेशले एउटालाई टिकट दिएको छ केन्द्रले अर्कैलाई दिने अवस्था आयो। तलमाथि गरे केन्द्रले प्रदेशको निर्णय उल्टाउँछ भन्ने सन्देश दिन खोजियो, यो गलत छ।’
प्रदेशले दिएका टिकट खोसेर केन्द्रबाट कतिपय पालिका प्रमुखको टिकट दिइएको थियो।
कांग्रेस विधानअनुसार महानगरको टिकट मात्र केन्द्रीय संसदीय समितिले दिन पाउँछ। यसपालि महानगर र उपमहानगरमा केन्द्रबाटै उम्मेदवार चयन गरिएका थिए।
केन्द्रले विधान मिचेर उम्मेदवार तय गरेको लुम्बिनी सभापति मगर बताउँछन्। विधानलाई निर्देशन र परिपत्र पठाएर मिच्न नहुने उनले बताए। उनले प्रदेशका निर्णय उल्टाउने र नमान्ने हो भने प्रदेश नै खारेज गरिदिए हुने बताएका छन्।
साथै उनले प्रदेश कार्यसमिति सञ्चालन गर्न आर्थिक समस्या परेको बताए। केन्द्रले गत चैतमै निर्णय गरेर लेबी प्रदेशलाई पनि पाउने व्यवस्था गरे पनि हालसम्म लेबी नपाएको मगर बताउँछन्।
‘प्रदेश कार्यसमिति चल्नै नसक्ने अवस्थामा छ। क्रियाशील सदस्यहरूबाट प्राप्त र जनप्रतिनिधिहरूबाट प्राप्त लेबी प्रदेशलाई अहिलेसम्म दिइएको छैन,’ उनले भने।
स्थानीय चुनावको समीक्षा गर्दै उनले लुम्बिनीमा गठबन्धन फलदायी नभएको बताए। गठबन्धन गरेका ४० मध्ये १६ सिट मात्र कांग्रेसले जितेको उनले बताए। तर गठबन्धन नगरी एक्लै उठेका ६९ पालिकामध्ये ३२ ठाउँमा कांग्रेसले जितेको उनले बताए।
गठबन्धन गर्दा माओवादी बलियो भएका क्षेत्रमा छाड्न नमानेको पनि उनले बताएका थिए। अब गठबन्धन गर्दा गम्भीर भएर रणनीतिक हिसाबले गर्नुपर्नेमा उनले जोड दिए।
