राष्ट्रिय सभा सदस्य वामदेव गौतमले नागरिकता सम्बन्धी विधेयक जस्ताको त्यस्तै पारित गर्नु राष्ट्रपतिप्रतिको अपमान हुने बताएका छन्।
शुक्रबारको राष्ट्रिय सभा बैठकमा बोल्दै गौतमले राष्ट्रपतिले पुनःविचारका लागि पठाएको नागरिकता सम्बन्धी विधेयक जस्ताको त्यस्तै पारित गरी पठाउनु राष्ट्रपति पद प्रतिको अपमान हुने बताएका हुन्।
‘म यसलाई पास गर्नुपर्छ। फर्काउनुपर्छ। जस्ताको त्यस्तै पठाउनुपर्छ। भन्ने विषयलाई मैले मेरो विचार यो छ भनेर भन्दिनँ। तर म भन्न चाहन्छु कि जस्ताको त्यस्तै पठाउने काम अहिलेको राष्ट्रपतिको अपमान हो’, उनले भने, ‘त्यो राष्ट्रपति पदको अपमान हो।’
उनले राष्ट्रपति विद्यादेवी भण्डारीले दिएको सन्देश बेठिक नभएको जिकिर गरे। उनले राष्ट्रपतिका सुझावहरू ग्रहण गर्न योग्य रहेको बताए। गौतमले यस विधेयकको सम्बन्धमा पुनःविचार गर्नुपर्ने बताए।
‘कतिपय विषयहरू अत्यन्त ग्रहणिय छन्। शिक्षा लिने किसिमका छन्। जस्ताको त्यस्तै पठायौँ भनेर गौरव गर्ने विषय होइन, यसमा ख्याल गर्नुपर्छ। पुनर्विचार गर्नुपर्छ,’ उनले भने।
उनले विधायन व्यवस्थापन समितिले नागरिकता विधेयकलाई जस्ताको त्यस्तै राष्ट्रिय सभामा पठाएकोप्रति असन्तुष्टि जनाए। यस विषयमा समितिमा छलफल नहुनु बौद्धिकतामाथिको हमला भएको टिप्पणी गरे।
