नेकपा एमालेका अध्यक्ष केपी शर्मा ओलीले युट्युब र टिकटकसँग टेलिभिजनहरू डराउनु नपर्ने बताएका छन्।
बुधबार बुटवलमा लुम्बिनी सामुदायिक टेलिभिजनको १७ औं वार्षिक साधारण सभामा बोल्दै ओलीले टेलिभिजनकै सूचना र समाचार सामग्री युट्युब र टिकटकमा आउने गरेकोले टेलिभिजनहरू डराउनु नपर्ने बताए।
‘टेलिभिजनहरू युट्युब, टिकटक, फेसबुकसँग तर्सिएको देख्छु,’ ओलीले भने,‘उनीहरूले टेलिभिजनकै समाचार सामग्री प्रयोग गरेका हुन्छन्, तिनीहरू व्यक्तिगत ढंगले चलेका हुन् टेलिभिजनहरू टिमवर्कमा चलेका हुन्छन्, सामूहिकतामा आधुनिक प्रविधि प्रयोग गर्दै इमानदार भएर काम गरे व्यक्तिले चलाउने युट्युब, टिकटक र फेसबुकसँग डराउनु पर्दैन।’
विश्वमै टेलिभिजनको इतिहास धेरै पुरानो नभई १०२ वर्षको मात्रै रहेको र नेपालमा १९८५ देखि श्यामश्वेत टेलिभिजन प्रशारण सुरू भएको उल्लेख गर्दै ओलीले बदलिँदो समय अनुसार नयाँ प्रविधिको प्रयोग गरे सञ्चार माध्यमको प्रभावकारिता बढ्ने सुझाव दिए।
२०४६ को परिवर्तनपछि सञ्चार जगतले व्यापकता लिएको उल्लेख गर्दै ओलीले ग्यालेक्सी प्रविधि अझै नेपालमा आइनसकेको बताए।
मन्तव्यका क्रममा ओलीले पाल्पाको रानीमहल दरबार ऐतिहासिक धरोहर भन्दै यसबाट प्रेरणा लिनुपर्ने बताए।
आफू प्रधानमन्त्री हुँदा रानीमहलसहित एक सय स्थानलाई पर्यटकीय स्थल घोषणा गरेको स्मरण गर्दै रानी तेजकुमारीको स्मरणमा खड्कशमसेरले बनाएकोले यसको नाम रानी तेजमहल बनाउनुपर्ने बताए।
‘रानीमहल त कस्को हो कस्को भन्ने पर्छ नि, तेजकुमारीको नाममा बनाएकाले यसको नाममा तेज जोडिनुपर्दछ, सबैले यसलाई यही भनेर बुझौं, ’ ओलीले भने।
अध्यक्ष ओली आजै पाल्पाको रानीतेजमहलमा सेल्फी खिचेर आएको बताए।
मिसन ग्रासरूट अभियानमा लुम्बिनीका ५ जिल्लामा रहेका उनी आजै रूपन्देहीको अभियानलाई सम्बोधन गरेर काठमाडौं फर्कने तयारीमा छन्।
