शिवरात्रिमा साथीले चुम्बन गरेको भिडिओ बनाएको भन्दै प्रहरीले सूर्यविनायक नगरपालिका-५ कटुञ्जेबाट तीन जनालाई पक्राउ गरेको छ।
साथीहरूले भिडिओ बनाएको भन्दै पीडित किशोरीले कटुञ्जे प्रहरी कार्यालयमा बताएकी थिइन्।
पछि प्रहरीले तीन जनालाई पक्राउ गरी शनिबार महानगरीय प्रहरी वृत्त, जगातीलाई बुझाएको थियो।
पीडितले उजुरी दिन नमानेपछि उनीहरूलाई अभद्र व्यवहारको मुद्दा चलाउने तयारी गरेको हो।
'साथीहरू हुन् डिलिट गरिदिए पुग्छ भन्ने मात्रै माग छ, तर उनीहरूले गल्ती गरेको भएर हामीले अभद्र व्यवहारको मुद्दामा अगाडि बढाउन लागेका छौं,'डिएसपी चक्रराज जोशीले सेतोपाटीलाई भने।
सिन्धुली दुधौली नगरपालिका–६का १८ वर्षीय शान्तिमान थामी दनुवार, सोही ठाउँका १९ वर्षीय अर्जुन अधिकारी र राजीव थनेत पक्राउ परेका हुन्।
उनीहरू शिवरात्रि मनाउन कटुञ्जेमा साथीको घर पुगेका थिए।
