चीनबाट ल्याइएका कोरोना परीक्षण गर्ने पोर्टेबल पिसिआर मेसिन प्रदेशहरूमा वितरण गरिने भएको छ।
आइतबार बसेको कोरोना रोकथाम तथा नियन्त्रण उच्चस्तरीय समन्वय समितिले ५ थानमध्ये चार वटा प्रदेशहरूलाई वितरण गरिने निर्णय गरेको छ।
जसअन्तर्गत प्रदेश-२ मा एक थान, बुटवल वा नेपालगञ्जमा रहने गरी प्रदेश-५ मा एक थान, सुर्खेतमा रहने गरी कर्णाली प्रदेशमा एक थान र सुदूरपश्चिम प्रदेशमा एक थान पठाइने छ।
बैठकले एक थान भने काठमाडौंमै राखिने र पछि परिस्थिति हेरेर बढी माग भएको ठाउँमा पठाउने निर्णय गरेको छ।
योसँगै अब हरेक प्रदेशमा कोरोना परीक्षणको सुविधा हुनेछ। आजबाट मात्रै धरानस्थित वीपी कोइराला स्वास्थ्य विज्ञान प्रतिष्ठानमा कोरोना परीक्षण सुरू गरिएको छ।