कोरोना आशंकामा दुई जना धुलिखेल अस्पतालमा भर्ना भएका छन्।
आइतबार ३४ वर्षीय एक युवक र सोमबार २२ वर्षीय युवक गरी दुई जना अस्पतालको आइसोलेसन कक्षमा भर्ना भएको अस्पतालका प्रवक्ता सुमन ताम्राकारले जानकारी दिए।
'हामी अहिले विशेष चनाखो भएर काम गर्दैछौं, कोरोनासँग मिल्दो लक्षण देखिएकाले उहाँहरूलाई आइसोलेसनमा राखेर उपचार गर्दै छौं,' उनले भने।
हिजो भर्ना भएका युवक दुबईबाट फागुन ३० गते नेपाल आएका थिए।
उनलाई दुई दिन अघिदेखि ज्वरो आएपछि अस्पताल भर्ना भएका हुन्।
उनको स्वाब परीक्षणका लागि काठमाडौंको टेकुस्थित राष्ट्रिय जनस्वास्थ्य प्रयोगशालामा पठाइएको छ।
यस्तै, आज भर्ना हुने युवक तीन हप्ता अगाडि भारतको सिलगुढी गएर आएका थिए। उनी त्यहाँ साथीहरूलाई भेट्न गएका थिए।
ज्वरो आएपछि नै भर्ना भएका उनको स्वाब परीक्षणका लागि पठाउन तयारी गरिएको डा. ताम्राकारले बताए।
अस्पतालमा भर्ना भएका दुबै जना काभ्रेका बासिन्दा हुन्।